काठमाडौँ। अफगानिस्तान क्रिकेट बोर्ड (एसीबी) ले वेस्ट इन्डिजका पूर्वअलराउन्डर ड्वेन ब्राभोलाई बलिङ कन्सल्टेन्ट नियुक्त गरेको छ।
अमेरिका र वेस्ट इन्डिजले संयुक्त रूपमा आयोजना गर्ने टी–२० विश्वकपका लागि अफगानिस्तानले उनलाई बलिङ कन्सल्टेन्ट नियुक्त गरेको हो।
अफगानिस्तानी टोली प्रतियोगिताका लागि सेन्ट किट्स एन्ड नेभिस पुगेको छ। अफगानिस्तानले त्यहाँ १० दिने प्रशिक्षण शिविर सञ्चालन गर्ने छ। त्यस अवधिमा ब्राभो टोलीमा समावेश हुनेछन्।
ब्राभोले वेस्ट इन्डिज टोलीबाट दुई पटक टी–२० विश्वकप जितेका छन्। सन् २०२१ को टी–२० विश्वकपपछि उनले अन्तर्राष्ट्रिय करिअरबाट सन्यास लिएका थिए।
यस वर्षको शुरूमा उनले आईएल टी २० मा खेलेका थिए, जहाँ च्याम्पियन एमआई इमिरेट्सको हिस्सा थिए। उनी टी–२० क्रिकेटमा सर्वाधिक विकेट लिने खेलाडी हुन्। उनले ५७३ खेलमा ६२५ विकेट लिएका छन्।
ब्राभो ५ पटकको इन्डियन प्रिमियर लिग (आईपीएल) च्याम्पियन चेन्नई सुपर किंग्सका बलिङ प्रशिक्षक पनि हुन्। उनले सन् २०२२ मा आईपीएलबाट सन्न्यास लिएपछि बलिङ प्रशिक्षकको जिम्मेवारी सम्हाल्दै आएका छन्। अफगानिस्तानले आफ्नो पहिलो अभ्यास खेल २९ मेमा ओमानसँग खेल्नेछ भने ३१ मेमा स्कटल्यान्डसँग खेल्नेछ।
समूह ‘सी’ मा अफगानिस्तानसँगै वेस्ट इन्डिज, न्यूजिल्यान्ड, पपुवा न्यू गिनी र युगान्डा छन्। अफगानिस्तानले विश्वकपमा आफ्नो पहिलो खेल ५ जुनमा युगान्डासँग खेल्नेछ।
