काठमाडौँ। क्रिकेटर सन्दीप लामिछानेलाई अमेरिकाले भिसा दिन अस्वीकार गरेको छ। विश्वकप खेल्न भिसा आवेदन दिएका सन्दीपलाई अमेरिकाले भिसा दिन अस्वीकार गरेको हो।
सन्दीपले सामाजिक सञ्जालमार्फत आफूलाई भिसा दिन अमेरिका दूतावासले अस्वीकार गरेको बताएका छन्। उनले भिसा नपाएपछि सम्पूर्ण शुभेच्छुकसँग माफ समेत मागेका छन्।
टी-२० विश्वकप अमेरिका र वेस्ट इन्डिजमा हुँदै छ। नेपाली टिम अमेरिका पुगिसकेको छ। नेपाली टिमसँग जोडिन सन्दीपले अमेरिकाको भिसा माग गरेका थिए। तर नेपालस्थित अमेरिकी दूतावासले भिसा दिनलाई अस्वीकार गरेको छ।
पछिल्लो समय सन्दीप बलात्कारको मुद्दामा कानुनी लडाई लडिरहेका थिए। उच्च अदालत पाटनले उनलाई बलात्कारको मुद्दामा सफाइ दिएको थियो।
अदालतबाट सफाइ पाएपछि क्यानले उनीमाथिको निलम्बन फुकुवा गरेको थियो। राष्ट्रिय क्रिकेट टिमका महत्त्वपूर्ण सदस्य रहेका सन्दीप नेपाली टिममा समावेश हुन अमेरिका जाने तयारीमा थिए।
नेपाललाई विश्वकपमा छनोट गराउन महत्त्वपूर्ण भूमिका खेलेका सन्दीपको भिसा अस्वीकार भएसँगै उनी राष्ट्रिय टिमसँग सहभागी हुने विषय अन्यौलता परेको छ।
