काठमाडौँ। सञ्जु सामसनको कप्तानीमा रहेको राजस्थान रोयल्स एक समय इन्डियन प्रिमियर लिग (आईपीएल) को लिग चरणमा शीर्ष दुईमा रहने निश्चित थियो।
तर, लगातार ४ हार र कोलकाता नाइट राइडर्सविरुद्धको अन्तिम खेल वर्षाका कारण रद्द भएपछि सनराइजर्स हैदरावादले त्यो स्थान खोस्यो।
त्यसैले राजस्थानले फाइनल पुग्न घुमाउरो बाटो तय गर्दै छ। बुधबार त्यही घुमाउरो बाटो पार गर्न एलिमिनेटरमा राजस्थानले आत्मविश्वासी रोयल च्यालेन्जर्स बेंग्लोरसँग खेल्दै छ।
मंगलबार राति सम्पन्न क्वालिफायर–१ मा हैदरावादलाई ८ विकेटले पराजित गर्दै कोलकाता सिधै फाइनलमा प्रवेश गरिसकेको छ।
बुधबार बेंग्लोर र राजस्थानबीचको एलिमिनेटरको विजेताले फाइनल प्रवेशका लागि हैदरावादसँग सामना गर्ने छ। तर, एलिमिनेटरमा हार्ने टोलीको भने आईपीएल यात्रा यहीँ समाप्त हुनेछ।
सन् २००८ मा आईपीएलको पहिलो संस्करणको विजेता राजस्थानलाई केही साताअघि उपाधिको प्रबल दाबेदार मानिएको थियो। तर, पछिल्ला ४ खेलमा उसको ब्याटिङ र बलिङको कमजोरी उजागर भएको छ।
जोस बटलरको इङ्ल्यान्ड फर्किनुले पनि राजस्थानको ब्याटिङमा असर पारेको छ। अब यशस्वी जयसवाल (३४८ रन), कप्तान सामसन (५०४ रन) र रियान पराग (५३१ रन) ले राजस्थानको ब्याटिङ लाइनमा अतिरिक्त जिम्मेवारी निर्वाह गर्नुपर्नेछ।
सामसन र परागबाहेक इङ्ल्यान्डका टम होलर क्याडमोरले पनि जयसवालसँग ओपनिङ गर्ने अपेक्षा गरिएको छ। शिमरोन हेटमायरले तल्लोक्रमलाई बलियो बनाउन सक्छन्।
यद्यपि, अहिलेसम्म उनले यस सिजनमा ब्याटबाट राम्रो प्रदर्शन गर्न सकेका छैनन्। अहमदाबादको नरेन्द्र मोदी स्टेडियम अन्य मैदानजस्तो ब्याट्सम्यान उपयुक्त नभएकाले राजस्थानका बलरहरू यहाँ उपयोगी साबित हुन सक्छन्।
यस मैदानमा १२ इनिङ्समा २ ०० भन्दा बढी रन बनेका छन्। अर्थात् अनुशासित बलिङ गर्ने टोली यस मैदानमा बढी हावी हुन सक्छ। यता, बेंग्लोर लगभग प्लेअफबाट बाहिरिसकेको थियो। पहिलो ८ मध्ये ७ खेलमा हार बेहोरेको फाफ डु प्लेसिसको टोलीको २ अंकमात्रै थियो।
तर, बेंग्लोरले सानदार पुनरागमन गर्दै पछिल्ला ६ खेलमा लगातार जित हासिल गर्यो। उसले लिग चरणको अन्तिम खेलमा डिफेन्डिङ च्याम्पियन चेन्नई सुपर किंग्सलाई समेत २७ रनले पराजित गर्यो।
यस खेलमा ब्याटिङतर्फ कप्तान फाफ डुप्लेसिस, रजत पाटीदार र विराट कोहली हाबी भए। यी तीन ब्याट्सम्यानले १४५ रन बनाएका थिए।
कोहलीले यो सिजन १४ खेलमा ७०८ रन बनाएका छन् र उनी राजस्थानविरुद्धको खेलमा ट्रम्प कार्ड साबित हुन सक्छन्। कप्तान डुप्लेसिस पनि लयमा फर्किएका छन् भने रजत पाटीदारले पनि ५ अर्धशतक बनाएका छन्।
इङ्ल्यान्डका विल ज्याक्सको बहिर्गमनले बेंग्लोरलाई कुनै असर गरेको छैन। तल्लोक्रमका दिनेश कार्तिकले १९५ को स्ट्राइक रेटभन्दा बढीमा रन बनाइरहेका छन्।
अन्तिम खेलमा चेन्नईका महेन्द्रसिंह धोनी र रविन्द्र जडेजाको अगाडि यश दयालले अन्तिम ओभरमा उत्कृष्ट बलिङ गर्दै टोलीलाई जित दिलाएका थिए। उनी यो लयलाई राजस्थानविरुद्धको खेलमा कायम राख्न चाहन्छन्।
