विराटनगर। देव खनालले आक्रामक शतकसँगै विराटनगरको वाईआरसीसी क्रिकेट क्लबले तेस्रो संस्करणको मिल्स कप टी–२० क्रिकेट प्रतियोगिताको उपाधि जितेको छ।
मंगलबार सम्पन्न भएको फाइनल खेलमा विराटनगरको होराइजन क्रिकेट क्लबलाई २०० रनको फराकिलो अन्तरले हराउँदै वाईआरसीसीले उपाधि जितेको हो।
वाईआरसीसीले दिएको २४७ रनको विशाल लक्ष्य पछ्याएको होराइजनले ७.१ ओभरमा सबै विकेट गुमाइ ४६ रन मात्रै बनाए। सुजन थपलिया १२ र दिनेश कँडेलले १० रन बनाए। होराइजनका अन्य ब्याटरले दोहोरो अंक ल्याउन सकेनन्।
वाईआरसीसीका हेमन्त धामीले एक्लै ३.१ ओभरमा १६ रन खर्चेर ७ विकेट लिए। उनी खेलको प्लेयर अफ द म्याच घोषित भए। त्यसैगरी विपिन खत्रीले ४ ओभरमा २९ रन खर्चेर ३ विकेट लिए।
त्यसअघि विराटनगर जुट मिलको खेल मैदानमा वाईआरसीसीले निर्धारित २० ओभरमा ९ विकेट गुमाई २४६ रन बनाएको थियो। वाईआरसीसीका देव खनालले आक्रामक ब्याटिङ गर्दै ३४ बलमा ११२ रन बनाए।
खनालले १२ छक्का र ८ चौका हिर्काए। उनले यसअघि पनि २९ बलमा शतक कटाएका थिए। नारायण जोशीले १६ बलमा ४९ रन बनाए। उनले ५ छक्का र ४ चौका हिर्काए।
अभिषेक पाठकले १८ बलमा ३३ रन पारी खेल्दा विपिन खत्रीले १४ रन बनाए। वाईआरसीसीका अन्य ब्याटरले दोहोरो अंक ल्याउन सकेनन्।
होराइजनका बलर इमरान शेखले ३ विकेट लिए। दिपेश कँडेल, श्रवण किस्कुले समान २/२ विकेट लिए। उपाधिसँगै वाईआरसीसीले १ लाख ५१ हजार र ट्रफी हात पारेको छ। उपविजेता बनेको होराइजनले ७५ हजार रुपैयाँमा चित्त बुझायो।
प्रतियोगिताको वेस्ट बलर होराइजन क्रिकेटका श्रवण किस्कु घोषित भए। उनले खेलभरिमा ११ विकेट लिए। वेस्ट ब्याटर वाईआरसीसीका देव खनाल र म्यान अफ द श्रीरिज वाईआरसीसीको अभिषेक पाठक घोषित भए। अभिषेकले खेलभरिमा २१६ रन बनाएका थिए। प्लेयर अफ द म्याच वाईआरसीसीका हेमन्त धामी भए।
