काठमाडौँ। दुई पटकको च्याम्पियन कोलकाता नाइट राइडर्स इन्डियन प्रिमियर लिग (आईपीएल) इतिहासमा पहिलो पटक तालिकाको शीर्ष स्थानमा उक्लिएर लिग टुंगाएको छ।
श्रेयस अय्यरको नेतृत्वमा रहेको टोलीले अब मंगलबार क्वालिफायर–१ मा सनराइजर्स हैदरावादको सामना गर्नेछ। दुई टोलीबीचको यो खेल अहमदाबादको नरेन्द्र मोदी स्टेडियममा हुनेछ।
कोलकाता अहिलेसम्म १३ पटक आईपीएलको प्लेअफमा पुगेको छ। ८ पटक जितेको टोलीले ५ खेलमा हार बेहोरेको छ। तर, क्वालिफायर–१ मा कोलकाताले कहिल्यै हार बेहोर्न परेको छैन। यस्तो अवस्थामा कोलकाताले हैदरावादलाई कडा चुनौती दिनसक्ने आकलन गरिएको छ।
लिग चरणमा अंक तालिकाको शीर्ष दुईमा रहेको कारण फाइनल पुग्न हैदरावाद र कोलकाताले दुई मौका पाउनेछन्। कोलकाता र हैदरावादबीचको क्वालिफायर–१ को विजेता टोली सिधै फाइनलमा प्रवेश गर्नेछ भने पराजित टोलीले बुधबार रोयल च्यालेन्जर्स बैंग्लोर र राजस्थान रोयल्सबीचको एलिमिनेटरको विजेतासँग प्रतिस्पर्धा गर्नेछ। बेंग्लोर र राजस्थानबीचको खेलमा हार्ने टोलीको यात्रा समाप्त हुनेछ।
आईपीएलको प्लेअफ
कोलकाताले सन् २०२१ मा प्रतिकूल परिस्थितिलाई पार गर्दै फाइनलमा स्थान बनाएको थियो। तर, उपाधि भिडन्तमा चेन्नई सुपर किंग्ससँग कोलकाता २७ रनले पराजित भएको थियो।
टोलीले क्वालिफायर–१ मा कुनै पनि खेल हारेको छैन। एलिमिनेटरमा दुई पटक र क्वालिफायर–२ मा दुई पटक हार बेहोरेको छ। अहिलेसम्म दुई पटक क्वालिफायर–१ खेलेको टोलीले दुवै पटक फाइनल पुगेर उपाधि जितेको छ।
