काठमाडौँ। ललितपुर मेयर्स कपको उपाधिका लागि विभागीय टोली एपीएफ र सुदूरपश्चिम प्रदेश भिड्ने भएका छन्।
लिग चरणको अन्तिम खेलमा बागमती प्रदेशलाई १०९ रनले पराजित गर्दै सुदूरपश्चिमले एपीएफसँगको उपाधि भिडन्त पक्का गरेका हुन्।
एपीएफ लिग चरणमा शतप्रतिशत जित हासिल गर्दै यसअघि नै फाइनलमा पुगिसकेको छ। एपीएफले ४ खेलबाट ८ अंक जोड्यो।
सुदूरपश्चिमले समान खेलबाट ६ अंक जोड्यो। बागमतीले भने १ खेलमा मात्रै जित हासिल गर्न सक्यो। सुदूरपश्चिमले दिएको १५८ रनको लक्ष्य पछ्याएको बागमतीले १६.१ ओभरमा ४८ रन मात्रै बनाउन सक्यो।
बागमतीकी करिष्मा गुरुङले सर्वाधिक १६ रन बनाइन्। २३ बल खलेकी उनले २ चौका प्रहार गरिन्। अन्यले भने दोहोरो अंकमा रन बटुल्न सकेनन्।
सुदूरपश्चिमका ऋतु कौन्जियारले सर्वाधिक ३ विकेट लिइन्। ४ ओभर बलिङ गरेकी उनले १ मेडनसहित ५ रन खर्चिइन्।
यस्तै, कविता जैशी र लक्ष्मी साउदले २/२ विकेट लिइन्। बिन्दु रावल र करिष्मा थापाको नाममा भने १/१ विकेट लिए।
त्यसअघि कीर्तिपुरस्थित त्रिवि क्रिकेट मैदान पहिला ब्याटिङ थालेको सुदूरपश्चिमले निर्धारित २० ओभरमा २ विकेट गुमाउँदै १५७ रन बनायो।
सुदूरपश्चिमकी सम्झना खड्काले अविजित रहँदै सर्वाधिक ७४ रन बनाइन्। ४७ बल खेलेकी उनले १० चौका प्रहार गरिन्।
रुवि पोदार र कप्तान बिन्दु रावल २८/२८ रनमा आउट हुँदा कविता जैशी २० रनमा अविजित रहिन्। बागमतीकी करिष्मा गुरुङले १ विकेट लिइन्।
