बाढीमा हुर्किएको क्लब सुदूरपश्चिम फुटबलको 'जीवनदाता'

सिताराम ओझा, धनगढी । बिस २०७३ सालमा सुदूरपश्चिममै पहिलो पटक धनगढीमा गोल्डकप फुटबलको आयोजना गर्दा धेरैलाई आश्चर्य लागेको थियो ।

पिछडिएको क्षेत्रमा निजी क्षेत्रको सर्वाधिक धनराशीको फुटबल आयोजना गर्न आयोजक सुदुरपश्चिम -११ स्पोर्ट्स क्लबलाई पनि सजिलो थिएन् । वाढीमा फुलेको फुटवल सर्वाधिक धनराशीको गोल्डकपसम्म

तर, विभिन्न बाधा र समस्याका बाबजुत पहिलो संकरणको 'सुदुरपश्चिम खप्तड गोल्डकप' प्रतियोगिता सम्पन्न भयो । 'ए' डिभिजन क्लब मनाङ मर्स्याङ्दी क्लबले  पहिलो संकरणको उपाधिमा कब्जा जमायो ।  उक्त संकरणमा नेपालका १० र भारतका २ गरी १२  टोलीले प्रतिस्पर्धा गरेका थिए ।

पहिलो संस्करणको प्रतियोगिता सफलतापुर्वक सम्पन्न भयो । विजेताले ५ लाख नगद तथा उपविजेताले २ लाख ५१ हजार नगद परपर गरेका थिए । यस्तै उत्कृष्ट खेलाडीले एक मोटरसाईकल र अन्य विभिन्न १० विधामा उत्कृष्ट खेलाडीले समान १५/१५ हजार नगद पुरस्कार पाएका थिए  ।

तर, आयोजक सुदुरपश्चिम -११ स्पोर्टस क्लबलाई प्रतियोगिता गर्दा लागेको खर्च तिर्न हम्मे हम्मे परेको थियो । जसको मुख्य कारण थियो, 'प्रतियोगिताका लागि सहयोगका लागि आश्वासन दिएकाहरुले सहयोग नगर्नु ।     

पहिलो संस्करणमा घाटामा गएपनि सुदूरपश्चिम-११ स्पोर्ट्स क्लबले गत बर्षको पुसमा दोस्रो संकरणको प्रतियोगिता आयोजना गर्यो । र, आयोजकले पहिलो संस्करणको भन्दा दोस्रो संस्करणमा दोब्बर पुरस्कार राशी राखेको थियो ।

दोस्रो संस्करणको विजेताले ११ लाख ११ हजार १ सय ११  र उपविजेताले ५ लाख ५५  हजार ५ सय ५५ नगद पाएका थिए । एक उत्कृष्ट खेलाडीले मोटरसाईकल प्राप्त गरे ।  दोस्रो संस्करणमा विभागीय टिम त्रिभुवन आर्मी क्लब च्याम्पियन बन्यो ।

दोस्रो संस्करणसम्म आईपुग्दा आयोजकले मुख्य प्रायोजक समेत प्राप्त गर्न सफल भयो । दोस्रो संस्करणको खप्तड गोल्डकपसंग सिजी ग्रुपको नेपाल आईस जोड्न पुग्यो ।

दुई संस्करणको आयोजनापछि अखिल नेपाल फुटबल संघले गोल्डकपहरुको श्रेणी विभाजन समेत गर्यो । जसमा खप्तड गोल्डकप 'क' श्रेणीमा पर्न सफल भएको छ ।

छोटो समयमै चर्चा कमाउन सफल खप्तड गोल्डकपको तेस्रो संस्करण मंगलबारबाट धनगढीमा सुरु हुँदैछ । र, तेस्रो संस्करणसम्म आईपुग्दा खप्तड गोल्डकप मोफसलकै सर्वाधिक ठुलो धनराशीको गोल्डकप बनेको छ ।

यस संस्करणको विजेताले २१ लाख र उपविजेताले १० लाख रुपैयाँ हात पार्नेछन् । उत्कृष्ट खेलाडीले यामाहाको १ सय ५० सीसी मोटरसाईकल प्राप्त गर्दा विधागत उत्कृष्ट विजेताले जनही १५/१५ हजार रुपैयाँ पाउने छन् । यस संस्कारणबाट नेपालमै पहिलो पटक क्यामरुनको टिमले प्रतिस्पर्धा जनाउदैछ ।

सुदूरपश्चिममा ठुलो प्रतियोगिता कसरी सम्भव भयो त ?

नेपालको सुदुरपुर्वी जिल्ला इलामदेखि, सुनसरी, कास्की, चितवन, नेपालगञ्ज लगायतका स्थानमा बार्षिक गोल्डकप फुटबलहरु संचालन हुँदै आईरहेको थियो ।

तर, सुदूरपश्चिममा एउटा पनि गोल्डकप प्रतियोगिता भएको थिएन । सुदूरपश्चिमको फुटबल बिकासमा सक्रिय युवाहरुलाई सुदूरपश्चिममा गोल्डकप नहुनुको अभाव खड्किएको थियो ।

त्यहिँ अभावलाई चिर्न फुटबलमा लागेका युवाहरु मिलेर सुदुरपश्चिम-११ स्पोर्ट्स क्लब गठन गरे । र, सुदूरपश्चिममा पहिलो संस्करणको गोल्डकप आयोजना गर्न लागि परे । सुदूरपश्चिममा पहिलो गोल्डकपको आयोजना गर्दा आवश्यकता परे व्यक्तिगत खर्च गर्ने प्रण गरे । सोही प्रणले पहिलो संस्करणको खप्तड गोल्डकप आयोजना भयो । तेस्रो संस्करणसम्म आईपुग्दा सर्वाधिक ठुलो धनराशीको प्रतियोगिता बन्न पुगेको छ ।

बाढी ग्रस्त क्षेत्रमा सक्रिय हिमालय युवा क्लबले सुदुरपश्चिमको प्रतिनिधित्व गर्दै सुदुरपश्चिम-११ को नामले विभिन्न प्रतियोगितामा सहभागिता जनाउन थालेपछि सुरेश हमालको नेतृत्वमा फुटबल प्रेमी युवाहरु मिलेर सुदुरपश्चिम–११ स्पोर्ट्स क्लब दर्ता भएको थियो । कैलाली जिल्ला खेलकुद विकास समितिमा दिपक बहादुर सिंह अध्यक्ष भएर आएपछि  फुटबल अभावलाई कम गर्न बनाईएको क्लबले अहिले सर्वाधिक ठुलो धनराशीको प्रतियोगिता धनगढीमा गराउन सफल भएका छन् ।

बाढीग्रस्त क्षेत्रबाट आएको फुटबललाई निजि क्षेत्रकै सर्वाधिक ठुलो धनराशीको बनाउने अभियानमा कैलाली जिल्ला खेलकुद विकास समितीका अध्यक्ष सिंहको योगदानलाई कसैले बिर्सन सक्दैन् ।

दुई बर्ष अघिदेखि सुदुरपश्चिममा आयोजना भएको गोल्डकपले यस क्षेत्रको  फुटबल विकाससंगै खेलकुद पर्यटनलाई पनि निकै टेवा पुगेको आयोजकको बुझाई छ ।

कैलालीको साबिकको लावोझी गाविस, बाढीको चपेटामा पर्ने गाविस हो । प्रत्येक बर्ष आउने बाढीले यस क्षेत्रमा क्षति गर्ने गर्छ । हरेक बर्षातामा पुरै गाउँ डुवानमा पर्ने हुँदा करौडौ धनजनको क्षति पनि हुने गरेको छ ।

बर्षात नजिकिदै जाँदा लालवोझी गाविसका वासिन्दाहरुमा चिन्ता र दुःखले पिरोल्ने गरेको छ । बर्षमा एक पटक उनीहरुलाई बाढीको चिन्ता छ हुन्छ तर त्यही बाढीले हुर्काएको क्लबबाट सुदुरपश्चिमको धनगढीमा पनि गोल्डकप फुटबल सम्भव भएको छ । त्यही बाढीग्रस्त क्षेत्रमा सक्रिय हिमालय युवा क्लब अहिले सुदूरपश्चिम -११ स्पोर्ट्स क्लब बनेको छ

सुदुरपश्चिम- ११ स्पोर्ट्स क्लबले २०७२ सालमा नेपालगंज गोल्डकपको उपाधि समेत चुमिसकेको छ । गत बर्ष नै राजर्षी गोल्डकपको उपाधि समेत सुदूरपश्चिम-११ ले जितेको छ । हाल क्लबका खेलाडीहरु सहिद स्मारक 'ए' डिभिजन लिगका विभिन्न क्लबबाट समेत खेलिरहेका छन् । बिस २०७३ सालमा सम्पन्न 'बी' डिभिजन लिगमा समेत सुदूरपश्चिमका खेलाडीहरु च्यासलबाट खेल्दै क्लबलाई च्याम्पियन बनाउदै 'ए' डिभिजनमा बढुवा समेत गराएका थिए ।

पछिल्लो समय सुदूरपश्चिममा फुटबलले गती लिन थालेको छ । तर, सुदूरपश्चिमले आशा गरेको जस्तो सफलता पाएको छ । छैटौं राष्ट्रिय खेलकुदमा सुदूरपश्चिमको पुरुष टिमले जितेको स्वर्ण नै यस क्षेत्रको सर्वाधिक ठुलो सफलता हो ।  ७ वर्ष अघिको त्यो ईतिहास सुदुरपश्चिमबासिले विर्सेका छैनन्  ।

त्यसयता सुदूरपश्चिममा फुटबल सुस्ताएको थियो ।  तर, त्यहिँ स्वर्ण जित्दा टिममा रहेका खेलाडीहरु एकजुट भएर अहिले ४० लाख नगद धनराशीको फुटबल प्रतियोगिता धनगढीमा गरिरहेका छन् । बाढीमा हुर्किएको क्लबले सुदूरपश्चिमको फुटबललाई नयाँ जीवन दिइरहेका छन् ।