मोटो ईन्डुरो : वर्षा र राजेश च्याम्पियन

पोखरा । पहिलो पोखरा मोटो ईन्डुरो क्रस च्याम्पियनसिप २०२४ भब्यताका साथ आयोजना भएको छ ।

बिश्व खेलकुद दिवसको अवसर पारेर आयोजना गरिएको प्रतियोगितामा महिला र पुरुष गरि ५६ जना खेलाडीले भाग लिएका थिए ।

बनजङ्गल, खोलानाला, बासघारी, गोरेटोबाटो, बगर बालुवामा उडाउने-गुडाउने सबै खालको मिश्रणले बनाइएको ५ किलोमिटरको ट्रयाक निर्माण गर्न झन्डै ३ महिना भन्दा बढी समय लागेको आयोजकले बताएका छन् । 

चैत्र २३ गते छनौट खेल खेलाएर २५ जना मेन ओपन इलाइट खेलाडी छनौट गरिएको थियो । यस्तै, महिलातर्फ ७ जना, ३०+ ओपन मास्टर्समा ७ जना खेलाडीलाई फाइनल खेल खेलाइएको थियो । 

महिलातर्फ ललितपुरकी बर्षा बस्नेत र पुरुष–ओपन इलाइटमा काठमाडौका राजेश मगरले उपाधि हात पारेका छन् । त्यस्तै गरि महिलातर्फ दोश्रो मन्दिरा भण्डारी र पोखराकी सुरक्षा केसीले तेस्रो स्थान हासिल गरिन् ।

पुरुष–ओपन इलाइटमा दोश्रो हुने अन्जित बुढाथोकी थिए भने तेस्रो हुने आशुतोष धोन्जु थिए ।

ओपन ३०+ मास्टर्समा राज शाहीले पहिलो स्थान लिए । दोश्रो हुनेमा बिकास श्रेष्ठ र तेस्रो हुनेमा अजित बराल थिए ।

पुरुषतर्फ ओपन इलाइटलाई विजेताले क्रमशः १ लाख ५० हजार, दोस्रोले एक लाख र तेस्रोले ५० हजार रुपैयाँ प्राप्त गरेका थिए भने महिलातर्फ विजेता ललितपुरकी बर्षा बस्नेतले १ लाख ५० हजार रुपैयाँ हात पारेकी थिईन् । 

उपसभामुख ईन्दिरा रानाले हरियो झन्डाले सङ्केत गरेर फाइनल खेलको सुरुवात गरेकी थिईन् । 

नेपाल अटो मोबाइलस एसोसिएसन (नासा नेपाल), अन्तराष्ट्रिय नियमक संस्था एफआईए, प्रदेश खेल्कुद परिषदसँगको सहकार्यमा प्रतियोगिताको आयोजना गरिएको हो ।