काठमाडौँ। युवा तथा खेलकुद मन्त्रालयले आफू मातहत भएका कामहरू सार्वजनिक गरेको छ। आइतबार मन्त्रालयका उपसचिव तथा सूचना अधिकारी लेखनाथ न्यौपानेले मन्त्रालयबाट ५ दिनमा भएका १० कामहरू सार्वजनिक गरेका छन्।
मन्त्रालयका अनुसार मूलपानी क्रिकेट रंगशाला, दशरथ रंगशाला र कीर्तिपुर क्रिकेट रंगशालाको अनुगमन गर्न अनुगमन टोली गठन गरी कार्यदिशा दिइएको छ। यस्तै, बहराइनमा भएको फिफा विश्वकप छनोटअन्तर्गत दोस्रो चरणमा सहभागी हुन राष्ट्रिय खेलकुद परिषद् (राखेप)बाट स्वीकृति नलिएको सम्बन्धमा कानुनबमोजिम आवश्यक कारबाही गरी मन्त्रालयलाई जानकारी गराउन पत्राचार गरिएको पनि बताइएको छ।
तर, कारबाहीसम्बन्धी जानकारी मन्त्रालयलाई प्राप्त नभएकोले सो सम्बन्धमा जानकारी गराउन ताकेता गरिएको बताइएको छ।
यी हुन् मन्त्रालयबाट भएका कार्यहरू
१. मूलपानी क्रिकेट रंगशाला, दशरथ रंगशाला र कीर्तिपुर क्रिकेट रंगशालाको अनुगमन गर्न अनुगमन टोली गठन गरी कार्यदिशा दिइएको ।
२. बहराइनमा हुने फिफा विश्वकप छनोटअन्तर्गत दोस्रो चरण कार्यक्रममा सहभागी हुन राष्ट्रिय खेलकुद परिषद्बाट स्वीकृति नलिएको सम्बन्धमा कानुनबमोजिम आवश्यक कारबाही गरी मन्त्रालयलाई जानकारी गराउन मिति २०८०/११/३० मा राष्ट्रिय खेलकुद परिषद्मा पत्राचार गरिएकोमा कारबाहीसम्बन्धी जानकारी मन्त्रालयलाई प्राप्त नभएकोले सो सम्बन्धमा जानकारी गराउन ताकेता गरिएको ।
३. विभिन्न खेल संघ संस्थाहरूको विवरण अद्यावधिक गर्न पदाधिकारीहरूको नाम, आम्दानी खर्चसमेतको विवरण उपलब्ध गराइदिन राष्ट्रिय खेलकुद परिषद्मा पत्राचार गरिएको।
४. विद्यालय स्तरको पाठ्यक्रममा खेलकुद विषय समावेश गर्न शिक्षा विज्ञान तथा प्रविधि मन्त्रालयमा अनुरोध गरी पठाइएको।
५. मन्त्रालय र अन्तर्गतका निकायहरूको नाममा कायम भएको बेरुजु वर्गीकरण गरी असुल उपर गर्नु पर्ने बेरुजुको कार्य योजना बनाई प्रधानमन्त्री तथा मन्त्रिपरिषद्को कार्यालयमा पठाइएको।
६. १९औँ एशियाली खेलकुदमा पदक विजेता खेलाडी, चौथो एशियन पारा खेलकुदमा पदक विजेता खेलाडी र विश्वकप टी–२० क्रिकेट प्रतियोगिताका लागि छनोट भएका खेलाडीलाई पुरस्कार प्रदान गर्न आवश्यक पर्ने बजेट २ करोड ९७ लाख १० हजार माग गरी अर्थ मन्त्रालयमा पुनः अनुरोध गरिएको ।
७. राष्ट्रिय खेलकुद नीति, २०८० को मस्यौदा स्वीकृत गरी छलफलमा लैजाने निर्णय भएको।
८. राष्ट्रिय युवा नीति, २०८० को मस्यौदामा सुझाव संकलन गर्न कर्णाली प्रदेशको सुर्खेतमा छलफल एवं अन्तरक्रिया कार्यक्रम सम्पन्न भएको ।
९. नेपाल स्काउटको भवन र जग्गा सहितको संरचना भाडामा लगाएको विषयमा विस्तृत विवरण नेपाल स्काउटसँग माग गरी प्राप्त हुन आएको विवरणको अध्ययन भइरहेको।
१०. माननीय मन्त्रीज्यूबाट इला स्थित ठूलो टुँडिखेल खेल मैदान र इलाम कवर्ड हल निरीक्षण भएको।
