ब्याडमिन्टर स्टार प्रिन्स सम्मानित हुने

काठमाडौं । राष्ट्रिय च्याम्पियन तथा शीर्ष एक बरियतामा रहेका प्रिन्स दाहाललाई १३ औं पुष्पलाल स्मृती राष्ट्रिय र्याङ्किङ्ग ब्याडमिन्टन प्रतियोगिताका दौरान सम्मान गरिने भएको छ ।

दाहाललाई आयोजकको तर्फबाट पूर्व घोषित निर्णय बमोजिम मोटरसाईकल सहित सम्मान गर्न लागिएको राष्ट्रिय ब्याडमिन्टन संघका महासचिव वीरेन्द्र श्रेष्ठले जानकारी गराए ।

संघले प्रतियोगिताको सुरुवात गर्दानै पुष्पलाल स्मृती राष्ट्रिय र्याङ्किङ्ग प्रतियोगिताको लगातार तीन संस्करणमा विजयी खेलाडीलाई मोटरसाईकलले सम्मान गरिने घोषणा गरेको थियो । सोही अनुरुप प्रिन्सलाई यस संस्करणमा सम्मान गर्न लागिएको हो ।

बिश्व ब्याडमिन्टन जुनियरमा शीर्ष १ मा रहिसकेका र हाल नेपाल ब्याडमिन्टन संघको शीर्ष वरियतामा रहेका प्रिन्सले पुष्पलाल स्मृती ब्याडमिन्टनको १० औं, ११ औं र १२ औं संस्करणको उपाधि हात पार्न सफल भएका थिए ।