टिकापुर र सत्यवती एकेडेमीको जित

कैलाली । धनगढीमा जारी लिटल फ्लावर प्रिमियर लिग एलपिएलको आठौँ संस्करण अन्तर्गत पाँचौ दिन युथ अफ टिकापुर र सत्यवती एकेडेमी विजयी भएका छन्।

युथ अफ टिकापुरले शारदा सेकेण्डरी स्कुललाई तथा सत्यवती एकेडेमीले जेएस स्पोर्ट्स ११ सुपर स्टार्सलाई पराजित गरेका छन् ।

बिहीबार पहिलो खेलमा युथ अफ टिकापुरले विजयी सुरुवात गर्ने क्रममा शारदा सेकेण्डरी स्कुललाई ९४ रनले पराजित गर्यो। 

युथ अफ टिकापुरले दिएको १ सय ९० रनको लक्ष्य पछ्याएको शारदाले २० ओभर ब्याटिङ गर्दै ६ विकेट गुमाएर ९५ रन मात्र बनायो। 

शारदाको ब्याटिङमा सुशान्त खत्रीले सर्वाधिक ३७ तथा सुबास सिंहले १६ रन योगदान दिए। युथ अफ टिकापुरका प्रकाश जैसीले ३ विकेट लिए भने मोहम्मद हुसेन, प्रेम शाह र सुमित महर्जनले १-१ विकेट लिए। 

यसअघि टस जितेर ब्याटिङ गरेको युथ अफ टिकापुरले १७ दशमलव ५ ओभरमा सबै विकेट गुमाएर १ सय ८९ रन बनायो। 

युथ अफ टिकापुरका कप्तान प्रेम शाहले सर्वाधिक ४८ रन बनाए। प्लेयर अफ द म्याच घोषित शाहले ३७ बलमा ७ चौका प्रहार गरे। यस्तै सुमित महर्जनले ३४, हरि चौहानले २५, प्रदिप ऐरीले २४ तथा मोहम्मद हुसेनले २३ रन बनाए।   

शारदाका विश्वास पन्त एक्लैले ६ विकेट लिए । उनले ३ दशमलव ५ ओभरमा ३१ रन खर्चिए। अभिषेक मल्लले २ तथा सुशान्त कार्कीले १ विकेट लिए। 

दोश्रो खेलमा सत्यवती एकेडेमीले विजयी सुरुवात गर्ने क्रममा जेएस स्पोर्ट्स ११ लाई ३ विकेटले पराजित गर्यो। 

जेएस स्पोर्ट्स ११ ले दिएको ९९ रनको लक्ष्य सत्यवतीले १२ दशमलव ५ ओभरमा ७ विकेट गुमाएर पुरा गर्यो। 

सत्यवतीको लागि ओपनर इमरान शेखले सर्वाधिक ३४ रन योगदान दिए । उनले २४ बलमा ५ चौका र १ छक्का प्रहार गरे। समिर कार्कीले १३ तथा खगेन्द्र जोशी ११ रन बनाए। 

जेएस स्पोर्ट्स ११ का बलर राज बमले ३, नितिश न्यौपानेले २ तथा साजन बिटालुले १ विकेट लिए। 

यसअघि टस जितेर ब्याटिङ गरेको जेएस स्पोर्ट्स ११ सुपर स्टार्सले २० ओभरमा ९ विकेट गुमाएर ९८ रन बनायो। 

जेएस स्पोर्ट्स ११ को लागि राजेश साउदले सर्वाधिक १९ तथा सुनिल चन्दले १७, रोयल बमले ११ तथा साजन बिटालुले ११ रन बनाए। 

सत्यवती एकेडेमीको बलिङमा अभिषेक कोइरालाले ३ विकेट लिए । फिर्दोश अन्सारी, रंजित कुमार र सन्तोष कार्कीले समान २-२ विकेट लिए। प्लेयर अफ द म्याच घोषित भएका अभिषेकले ४ ओभरमा १५ रन खर्चिए। 

प्रतियोगिता अन्तर्गत छैठौं दिन विहान ९ बजे युथ अफ टिकापुर र धनगढी क्रिकेट एकेडेमी तथा दोश्रो खेल दिउँसो १ बजे धनगढी स्पोर्ट्स क्लब र शुक्लाफांटा ब्ल्याकबक्सबीच प्रतिस्पर्धा हुनेछ। 

लिटल फ्लावर स्पोर्टस् क्लबको आयोजनामा सुरु भएको प्रतियोगिताको यो आठौँ संस्करण हो। प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउने छन्।

प्रतियोगितामा काठमाडौँ, रौतहट, दाङ, कैलाली र कञ्चनपुरका गरी १६ वटा टिमको सहभागिता रहेको छ।