काठमाडौं । एकदिवसीय विश्वकप क्रिकेटको लिग चरणको अन्तिम खेलमा पाकिस्तानले इङ्ल्याण्डसँग हार ब्यहोरेको छ ।
इडेन गार्डेनमा शनिबार भएको खेलमा इङ्ल्याण्डले पाकिस्तानलाई ९३ रनले हराएको छ ।
पछिल्लो हारसँग पाकिस्तानको विश्वकप यात्रा टुङ्गिएको छ । उसको सेमिफाइनल पुग्ने सपना पुरा हुन पाएन ।
यस विश्वकपमा खराब प्रर्दशन गरेको इङ्ल्याण्डले भने पाकिस्तानलाई हराउँदै च्याम्पियन्स ट्रफीमा आफुलाई नजिक पुर्याएको छ ।
इङ्ल्याण्डले प्रस्तुत गरेको ३ सय ३८ रनको लक्ष्य पछ्याएको पाकिस्तान ४३ दशमलव ३ ओभरमा २ सय ४४ रनमा अलआउट भयो ।
आगा सलमानको ५१ रनको अर्धशतकिय इनिङ्समा कप्तान बाबर आजमले ३८, मोहमद रिजवानले ३६, हरिस रौफले ३५, साउद सकिलले २९ रन बनाएका थिए । साहिन साह अफ्रिदीले २५ र मोहमद वासिमले अविजित १६ रन बनाएका थिए ।
इङ्ल्याण्डका डेभिड विलीले ३ तथा आदिल रासिद, मोइन अली र गुस एट्किन्सनले समान २ विकेट हात पारेका थिए । क्रिस वाक्सको नाममा एक विकेट रह्यो ।
इङ्ल्याण्डले टस जितेर ब्याटिङ गर्ने निर्णय गरेर ३ सय ३७ रन बनाउने बित्तिकै पाकिस्तानको सेमिफाइनल पुग्ने सम्भावना लगभग सकिएको थियो ।
इङ्ल्याण्डका लागि वेन स्टोक्सले ८४ रनको इनिङ्स खेलेका थिए । यस्तै जो रुटले ६० र जोनी बोयरस्टोले ५९ रनको योगदान दिएका थिए । डाविन मालनले ३१, ह्यारी ब्रोकले ३०, जोस बटलरले २७ रन बनाएका थिए । अन्यको प्रर्दशन उल्लेख्य रहेन ।
पाकिस्तानका हारिस रौफले ३ तथा साहिन अफ्रिदी र मोहमद वासिमले समान २ विकेट लिए । इफ्तिकर अहमेदले एक विकेट चट्काए ।
सेमिफाइनल पुग्न पाकिस्तानलाई अविश्वसनीय रनरेटको जित निकाल्न आवश्यक थियो । तर इङ्ल्याण्डसँग हारेसँगै पाकिस्तान सेमिफाइनल पुग्नमात्र बञ्चित भएको छैन, विश्वकप यात्रा समेत टुङ्गिएको छ ।
लिग चरणको अन्तिम खेलमा जित निकाल्दै पाकिस्तानको ९ खेलबाट ८ अंक सहित पाँचौं स्थानमा रह्यो । इङ्ल्याण्ड ६ अंक सहित सातौं स्थानमा रह्यो ।
