एरिका र कबड्डी खेलाडीले कति पुरस्कार प्राप्त गर्लान् ?

काठमाडौं । एसियाली गेम्सको १९ औं संस्करणमा नेपालले एक रजत र एक काँस्य पदक हात पार्यो । आईतबार हान्जाओमा सम्पन्न प्रतियोगितामा नेपालबाट कराँतेकी एरिका गुरुङले ब्यक्तिगत स्पर्धामा रजत पदक हात पारिन् भने कबड्डीको महिला टोलीले टिम इभेन्ट्समा काँस्य पदक प्राप्त गर्यो ।

खेलाडीले अन्तराष्ट्रिय प्रतियोगितामा पदक जित्दा नेपाल सरकारले राष्ट्रिय खेलकुद विकास ऐन र नियमावलीमार्फतनै पुरस्कारको स्पष्ट ब्यवस्था गरेको छ । विजेता खेलाडीको पुरस्कार सुनिश्चित गर्न र पुरस्कार रकममा एकरुपता ल्याउन सरकारले नियमावली मार्फतनै यो व्यवस्था गरेको छ ।

एसियाडमा रजत पदक जितेकी एरिकाले सरकारको नियम अनुसार नगद १९ लाख ५० हजार रुपैयाँ प्राप्त गर्नेछिन् । एसियाली खेलकुदमा ब्यक्तिगत स्पर्धामा रजत पदक विजेता खेलाडीलाई सरकारले सो रकम ब्यवस्था गरेको छ । 
पुरस्कार खेलाडीको रुपमा एरिकाले मात्र प्राप्त गर्ने छैनिन्, प्रशिक्षकको रुपमा कुशल श्रेष्ठले समेत रजत पदकको ३ लाख ९० हजार रुपैयाँ नगद प्राप्त गर्नेछन् । एरिकासँग जोडिएका सहायक प्रशिक्षक, व्यवस्थापक, फिजियोलाई समेत सरकारले जनही १ लाख ९५ हजार रुपैयाँ नगद प्रदान गर्नेछ ।

एसियाली खेलकुदको पदकको पुरस्कार खेलाडी, प्रशिक्षक र अफिसियलले मात्र प्राप्त गर्नेछन्, सम्बन्धित खेल संघले समेत प्राप्त गर्नेछ । सोही अनुसार नेपाल कराँते महासंघले एरिकाको पदकबाट ६ लाख ५० हजार रुपैयाँ प्राप्त गर्नेछ । 
एरिकाले रजत जित्नुअघि नेपालको पदकको सुन्यतालाई चिरेको थियो, महिलाको कबड्डी टिमले । नेपालका लागि महिला कबड्डीमा काँस्य पदक जित्ने टिमका खेलाडीले जनही ३ लाख ९० हजार रुपैयाँ पुरस्कार प्राप्त गर्नेछन् । मुख्य प्रशिक्षकको रुपमा पार्वती राईले २ लाख ६० हजार रुपैयाँ नगद पुरस्कार प्राप्त गर्नेछिन् । 

महिला कबड्डी टिमसँग जोडिएका सहायक प्रशिक्षक, व्यवस्थापक, फिजियोले भने जनही १ लाख ३० हजार रुपैयाँ प्राप्त गर्नेछन् । देशका लागि काँस्य पदक जिताउने नेपाल कबड्डी संघले भने ३ लाख ९० हजार रुपैयाँ पुरस्कार सरकारले प्रदान गर्नेछ ।

त्यसो भए नेपाली खेलाडीले एसियन गेम्समा स्वर्ण पदक जितेको भए कति पुरस्कार पाउथे त ? 

यदी कुनै नेपाली खेलाडीले एसियन गेम्सको ब्यक्तिगत स्पर्धामा स्वर्ण पदक जितेको भए ३२ लाख ५० हजार रुपैयाँ प्राप्त गर्ने थिए । टिम इभेन्ट्सबाट जितेका थिए, प्रत्येक खेलाडीले १३ लाख रुपैयाँ नगद पुरस्कार प्राप्त गर्ने थिए ।