मार्करम र दक्षिण अफ्रिकाको कीर्तिमानी रन

काठमाडौं । आईसीसी एकदिवसीय विश्वकपमा दक्षिण अफ्रिकाले कीर्तिमानी स्कोर सहित जित दर्ता गरेको छ ।

शनिबार श्रीलंकाविरुद्ध खेल्दै एकदिवसीय विश्वकपमा कीर्तिमानी ४ सय २८ रन जोडेको दक्षिण अफ्रिकाले ऐतिहासिक जित दर्ता गरेको हो । 

एडियन मार्करमले ४९ बलमा सबैभन्दा छिटो शतक प्रहार गर्दै कीर्तिमान बनाएको खेलमा दक्षिण अफ्रिकाले समेत ४ सय २८ रनको ऐतिहासिक आँकडा बनाएको हो । यसअघि सन् २००९ मा रोजकोटमा अफगानिस्तानविरुद्ध अष्ट्रेलियाले ४ सय १४ रनको कीर्तिमानी रन बनाएको थियो ।

सुरुआती ब्याटिङ गरेको दक्षिण अफ्रिकाको इनिङ्समा क्विटन डी कक, रासी वेन डेर डुसेन र एडेन मार्करम तीनै जना खेलाडीले शतकीय इनिङ्स खेले ।

मार्करमले ४९ बलमा शतक प्रहार गरे । यसअघि आयरल्याण्डका केविन ओ ब्रायनले सन् २०११ मा ईङ्ल्याण्डविरुद्ध ५० बलमा शतक प्रहार गरेका थिए । 

अफ्रिकी टोलीका लागि डी ककले सय, डुसेनले १ सय ८ र मार्करमले १ सय ६ रन बनाए । ओपनर कप्तान टेम्बा बाभुमाले ८ र हेनरिक क्लासेनले ३२ रन बनाएका थिए । डेभिड मिल्नरले ३९ र मार्को जानसेनले १२ रन बनाएका थिए । 

श्रीलंकाका दिशान मदुशंकाले सर्वाधिक दुई तथा कसुन राजिथा, डुनिथ वेललेज, मथिशा पथिरानाले समान एक एक विकेट लिएका थिए ।

अफ्रिकी टिमले प्रस्तुत गरेको ४ सय २९ रनको विशाल लक्ष्य पछ्याएको श्रीलंकाले ४४ ओभर ५ बलमा अलआउट हुँदै ३ सय २६ रन जोड्यो । 

चरित असलांकाले सर्वाधिक ७९ रन बनाएको इनिङ्समा कुशल मेन्डिसले ७६ र दासुन शनाकाले ६८ रन बनाए । कसुन राजिथाले ३३, सदीरा समरबिक्रमाले २३ र धनन्जय डी सिल्भाले ११ रन बनाएका थिए । अन्यले दोहोरो अंकको स्कोर छुन सकेनन् । 

अफ्रिकी टिमका जेराल्ड कोएत्जीले सर्वाधिक ३ विकेट लिए । केशव महाराज, कागिसो रबाडा र मार्को जानसनले समान २ विकेट लिदाँ लुंगी एनगिडीले १ विकेट चट्काए ।