वान डे विश्वकप – दुई खेल हुँदै

काठमाडौं । एकदिवसीय विश्वकपमा आज शनिबार दुई खेल हुदैछ । 

पहिलो खेलमा बंगलादेश र अफगानिस्तान धर्मशालामा बिहान पौने ११ बजे भिड्नेछन् । अर्को खेलमा साउथ अफ्रिका र श्रीलंका भिड्नछन् । दिल्लीमा हुने खेल दिउँसो सवाँ २ बजे सुरु हुनेछ ।

चारवटै टिम वान डे विश्वकपमा पहिलो म्याच खेल्दैछन् ।

अफगानिस्तान आईसीसी विश्वकपमा बंगलादेशविरुद्ध पहिलो जित दर्ता गर्ने लक्ष्यमा हुनेछ । एक महिना अघि भएको एसिया कपमा बंगलादेशले अफगानिस्तानलाई हराएको थियो । अफगानिस्तान तेस्रो पटक विश्वकप खेल्दैछ । उसले पहिलो पटक सन् २०१५ मा डेब्यु गरेको थियो । 

विश्व क्रिकेटका ठुला लेग स्पिनर तथा अलराउण्डर रसिद खान रहेको अफगानिस्तानले आफ्नो बेग्लै पहिचान बनाईसकेको छ ।

बंगलादेश प्रतियोगिता अघि टिम छनोटको विवादबाट बाहिर निस्कन खोज्नेछ । सन् २०१५ मा क्वार्टरफाइनल पुग्नुनै बंगलादेशको विश्वकपमा राम्रो नतिजा हो । 

अर्को खेलमा भिड्न लागेका श्रीलंका र साउथ अफ्रिका दुवै टिम फर्ममा छन् । श्रीलंका भर्खरै सम्पन्न एसिया कपको उपविजेता टोली हो । साउथ अफ्रिकाले भने अष्ट्रेलियाविरुद्धको सिरिज जितेको थियो । 

दुवै टिमले ८० एकदिवसीय खेलमा प्रतिस्पर्धा गरेका छन् । जसमा साउथ अफ्रिका ४५ र श्रीलंका ३३ खेलमा विजयी भएको छ ।