काठमाडौं । आगामी महिना नेपालमा हुने आइसीसी टी-ट्वान्टी विश्वकप २०२४ को एसिया क्षेत्र छनोटमा नेपाल र युएई फरक समूहमा परेका छन् ।
प्रतियोगिता आगामी कार्तिक १३ देखी २० गते (३० अक्टोबर देखी नोभेम्बर ६) सम्म मुलपानी र टियु क्रिकेट मैदानमा हुँदैछ ।
समूह ए मा घरेलु टोली नेपाल रहँदा युएई भने समूह बी मा रहेको छ ।
समूह ए मा नेपालसँगै सिंगापुर, ओमान र मलेसिया छन् । समूह बी मा युएई सहित बहराइन, हङकङ र एसिया क्वालिफायर ए बाट आउने राष्ट्र रहेको छ ।
एसिया क्वालिफायर ए छनोटमा कुवेत, माल्दिभ्स, कतार र साउदी अरेविया छन् ।
क्वालिफायर ए सेप्टेम्बर २८ देखी ५ अक्टोबर सम्म कतारमा हुँदैछ । जसको विजेता टोली नेपाल आउने छ ।
विश्वकप छनोटका सेमिफाइनलमा विजेता दुई टोली आगामी वर्ष अमेरिका र वेस्टइन्डिजमा हुने टी-ट्वान्टी विश्वकप खेल्न पाउनेछन् ।
घरेलु मैदानको फाइदा उठाउदै नेपाल दोस्रो पटक विश्वकपमा पुग्ने लक्ष्यमा रहेको छ ।
