काठमाडौं । कतारमा जारी रहेको गल्फ टी-ट्वान्टी अन्तर्राष्ट्रियमा बलियो मानिएको ओमानमाथि बहराइनले रोमान्चक जित निकालेको छ ।
कतारमा मंगलबार राती भएको खेलमा बहराइनले १ रनको रोमान्चक जित दर्ता गरेको छ ।
बहराइनले दिएको १ सय २४ रनको लक्ष्य पछ्याएको ओमान २० ओभरमा १ सय २२ रनमा अलआउट भयो ।
ओमानका लागि ओपनर कश्यप प्रजापतीले ५३ बलमा ३ चौकाको सहयोगमा ४९ रन बनाए । आयान खानले २१ बलमा २ चौकाको सहयोगमा २४ रन बनाए ।
ओमानलाई अलआउट गर्न रिजवान बटले ४ ओभरमा २६ रन खर्चिएर ४ विकेट लिए । इमरान अनअरले २ तथा सथैया वीरपतिरण र हैदर बटले समान १/१ विकेट लिए ।
त्यसअघि टस हारेर पहिले ब्याटिङ गरेको बहराइनले निर्धारित २० ओभरमा ७ विकेट गुमाएर १ सय २३ रन बनाएको थियो ।
बहराइनका लागि इमरान अलिले ५५ बलमा ३ चौका र १ छक्काको सहयोगमा ४४ रन बनाए । हैदर बटले १८ बलमा ३ चौकाको सहयोगमा २० रन बनाए ।
जितका साथ बहराइन ४ खेलमा २ जित र २ हारका साथ ४ अंकमा रहेको छ । अंक तालिकामा बहराइन चौथो स्थानमा छ ।
पराजित ओमान ३ खेलमा २ अंकका साथ पाँचौं स्थानमा रहेको छ ।
प्रतियोगितामा कतार, कुवेत, साउदी अरेविया, बहराइन, ओमान र युएई गरि ६ टोली सहभागी छन् । प्रतियोगितामा शीर्ष दुई टोली फाइनल खेल्नेछन् ।
