काठमाडौं । एडेन माक्ररमको शतकको सहयोगमा घरेलु टोली दक्षिण अफ्रिकाले तेस्रो ओडिआईमा अष्ट्रेलियालाई हराएको छ ।
मंगलबार राती सम्पन्न खेलमा दक्षिण अफ्रिका १ सय ११ रनको फराकिलो अन्तरले विजयी भएको हो ।
जितसँगै पाँच खेलको ओडिआई सिरिज दक्षिण अफ्रिकाले २-१ मा पुर्याएको छ ।
दक्षिण अफ्रिकाले दिएको ३ सय ३९ रनको लक्ष्य पछ्याएको अष्ट्रेलिया ३४ दशमलब ३ ओभरमा २ सय २७ रनमा अलआउट भयो ।
अष्ट्रेलियाका लागि ओपनर डेबिड वार्नरले ५६ बलमा १० चौका र ३ छक्काको ७८ रनको अर्धशतकीय ईनिङ खेले । अर्का ओपनर ट्राभिस हेडले २४ बलमा ६ चौका र १ छक्काको सहयोगमा ३८ रन बनाए ।
कप्तान मिचेल मार्शले २६ बलमा २९ रन बनाए । मार्नुस लाबुसेनले १५ तथा एलेक्स केरीले १२ रन बनाए ।
दक्षिण अफ्रिकाका लागि जेरार्ड कोट्जेले ४ तथा तबरेज साम्सि र केशव महाराजले समान २/२ विकेट लिए ।
त्यसअघि टस हारेर पहिले ब्याटिङ गरेको दक्षिण अफ्रिकाले निर्धारित ५० ओभरमा ६ विकेट गुमाएर ३ सय ३८ रन बनाएको थियो ।
दक्षिण अफ्रिकाका लागि एडेन माक्ररमले ७४ बलमा ९ चौका र ४ छक्काको सहयोगमा अविजित १ सय २ को शतकीय ईनिङ खेले । टिम्बा बभुमा र क्विटन डि ककले अर्धशतकीय ईनिङ खेले ।
कप्तान बभुमाले ६२ बलमा ५७ रन बनाए । डि ककले ७७ बलमा ८२ रन बनाए । पहिलो विकेटका लागि बभुमा र डि ककले २२ दशमलब ५ ओभरमा १ सय ४६ रनको सानदार सुरुआत दिलाएका थिए ।
रिजा हेनरिकले ३९ तथा मार्को यानसनले ३२ रन बनाए ।
अष्ट्रेलियाका लागि ट्रेभिस हेडले २ तथा तनबिर सान्गा, नाथन एलिस र मार्कस स्टोईनेसले समान १/१ विकेट लिए ।
चौथो ओडिआई खेल आगामी शुक्रबार रहेको छ ।
