पीएसपीएलको अक्सनमा २ सय ३२ खेलाडी दर्ता

अर्जुन काफ्ले ।

पथरी । चौथो संस्करणको पथरीशनिश्चरे प्रिमियर लिग क्रिकेट प्रतियोगिताको अक्सनका लागि २ सय ३२ खेलाडी दर्ता भएका छन् ।

विभिन्न ३ ‘क्याटोगरी’ अन्तर्गत खेलाडी दर्ता भएका हुन् । लिग आयोजक पथरीशनिश्चरे प्रिमियर लिग समितीका अनुसार असोज ६ गते हुने अक्सनवाट ७ वटा क्लबले कम्तीमा १४ खेलाडी अनुबन्धन गर्नु पर्नेछ ।

सुरुवाती तीन संस्करणको प्रतियोगीता सम्पन्न भइ सकेको लिग यस वर्ष कार्तिक ९ बाट सुरु हुने तालिका छ ।आयोजकले अक्सनका लागि प्रकाशित गरेको खेलाडी ‘ड्राफ्ट’मा पहिलो ‘क्याटोगरी’मा ५१ जना खेलाडी ‘ए क्याटोगरी’मा दर्ता भएका छन् । ३३ जना ‘बी’ मा र १ सय ४९ जना ‘सी क्याटोगरी’मा दर्ता भएका छन् ।

‘क्याटोगरी ए’ मा दर्ता भएका खेलाडीको ३ हजार ‘वेस प्राइज’ तोकिएको छ भने ‘बी’ को २ हजार र ‘सि’ को १ हजार ‘वेस प्राइज’ तोकिएको छ । प्रत्येक टिमका लागी ५० हजार रुपयाँ ‘वालेट’ राखिएको छ ।

यस संस्करणमा २ जना खेलाडीलाई मात्र ‘रिर्टन’ गर्न पाउने छन् भने अरु खेलाडी ‘रिलिज’ गर्नु पर्ने आयोजकका अध्यक्ष विरोज मगरले जानकारी दिए । 

पथरीशनिश्चरे भित्रका खेलाडीलाई मात्रै सहभागी गराउदै आएको प्रतियोगीताको चौथो संस्करणबाट नगर बाहिरका चार खेलाडीलाई क्लबले अनुवन्धन गर्न पाउने भएको छ । ‘बाहिरका खेलाडी पनि सहभागी गराएर प्रतियोगीताको स्तरवृद्धि गर्न लागेका छौ’ अध्यक्ष मगरले भने ‘यस पटकबाट प्रतियोगीताको प्रचार थप हुन्छ भन्ने विश्वास लिएका छौ’ ।

यस वर्ष हुने प्रतियोगीताको अक्सन ड्राफ्टमा उमेर समुहबाट अन्तराष्ट्रिय प्रतियोगीतामा सहभागीता जनाएका दिपेश कँडेल देखि प्रदेशको टोलीबाट विभिन्न कपमा सहभागीता जनाएका खेलाडी समेटिएका छन् ।

खेलाडीको ड्राफ्टमा प्रदेशको टिमबाट राष्ट्रिय प्रतियोगीतामा सहभागीता जनाएका फिरदोस अन्सारी, सोनु मण्डल, श्रमण यादव, ज्ञानेन्द्र श्रेष्ठ, सुजन थपलिया लगायतका खेलाडीलाई ड्राफ्टमा समेटिएको छ ।

आयोजकका सचिव राकेश राईका अनुसार प्रतियोगीताको लोकप्रियता बिस्तारै बढ्दै गएको छ । खेलाडीहरुको आर्कषणकै कारण प्रतियोगीतालाई निरन्तरता दिन सकिएको उनले बताए ।  

पथरीशनिश्चरेमा मात्रै प्रदेश स्तरिय ३ वटा प्रतियोगीता आयोजना हुने गरेको भएपनि निरन्तरता पाउन सकेको छैनन् ।
यस पटक सवैभन्दा कम १० वर्षका खेलाडी समेत अक्सनको लिष्टमा समेटिएका छन भने ४३ वर्षका खेलाडी राज वस्नेतको समेत नाम अक्सन लिष्टमा रहेको छ ।

अघिल्लो सस्करणमा भन्दा यस संस्करणको अक्सनमा धेरै खेलाडी दर्ता भएका छन् । पहिलो संस्करणमा १ सय ३६ जना खेलाडी अक्सनमा सहभागी भएका थिए भने अघिल्लो संस्रणमा १ सय ३५ खेलाडीलाई अक्सनमा सहभागी गराएर टिमले खरिद गरेका थिए । 

स्थानीय क्रिकेट खेलाडीको उत्पादन गर्न र क्रिकेट प्रतिभा पहिचान गर्न चौथो संस्करणको क्रिकेट लिग प्रतियोगीता आयोजना गर्न  लागिएको आयोजकले जनाएको छ ।