नेपालले सेमिफाइनलमा थाईल्यान्डसँग खेल्ने

काठमाडौं । आइसीसी महिला टी-ट्वान्टी विश्वकप एसिया क्षेत्र छनोटको सेमिफाइनलमा नेपालले थाईल्यान्डसँग खेल्ने भएको छ । 

अन्तिम खेलमा थाईल्यान्डले हङकङलाई ४३ रनले हराउदै समूह बी को विजेता बनेको हो । नेपालले समूह ए को उपविजेता रहेकोले नेपाल थाईल्यान्डको सेमिफाइनल पक्का भएको हो । 

समूह बी को उपविजेता बनेको हङकङले समूह ए को विजेता युएईसँग सेमिफाइनल खेल्ने छ ।

बुधबार नै तय भएको नेपाल र युएईविरुद्ध खेल वर्षाका कारण रद्द भएसँगै नेपाल समूह ए को उपविजेताको रुपमा सेमिफाइनल पुगेको थियो । 

नेपालले शुक्रबार थाईल्यान्डसँग सेमिफाइनलमा खेल्ने भएको हो । 

सेमिफाइनलमा विजयी भएमा नेपालले महिला टी-ट्वान्टी विश्वकपको ग्लोबल छनोटमा स्थान बनाउने छ ।

नेपालले पहिलो खेलमा मलेसियालाई ५ रन र दोस्रो खेलमा बहराइनलाई १० विकेटले हराएको थियो । 

तेस्रो खेलमा भुटानलाई ३ विकेटले हराएको नेपालले चौथो खेलमा कतारलाई ८ विकेट हराएको थियो ।

शनिबार प्रतियोगिताको फाइनल खेल रहेको छ । प्रतियोगितामा ११ राष्ट्रको सहभागीता रहेको छ ।