नेपाल टी-ट्वान्टीबाट मैले एक पैसा पनि पाएको छैन - सागर  

काठमाडौं । काठमाडौं नाइट्सका फिजियो सागर पाण्डेले नेपाल टी-ट्वान्टी लिगबाट आफूले एक रुपैयाँ पनि नपाएको सामाजिक सञ्जालमार्फत बताएका छन् । 

गत वर्ष पुसमा सम्पन्न नेपाल टी-ट्वान्टी लिगमा नाईट्सका केही खेलाडीले ५० प्रतिशतसम्म पारिश्रमिक पाए पनि आफूले हालसम्म एक रुपैयाँ पनि नपाएको गुनासो पोखेका छन् ।

'म टिममा जोडिएको दोस्रो दिनमा नै टिमका व्यवस्थापक भागेका थिए । जसले गर्दा मैले सम्झौता गर्न पाएन । यो कुरा मैले नाईट्स र क्यान दुबैलाई बताएको थिए । टिमका सबै कर्माचारी एक एक गरि भाग्दा अन्तिमसम्म म मात्र खेलाडीसँग थिए । र मैले भूमिका र जिम्मेवारी निर्वाह गरेको थिए', उनले लेखेका छन् ।

खेलाडीले पैसा नपाएसम्म नखेल्ने भनि खेल नै रोकेका थिए । काठमाडौं र विराटनगरबीचको खेल हुन नसकेपछि क्यानले लिखित सम्झौता गरेको थियो । 'लिखित सम्झौतमा फिजियोको पनि पारिश्रमिक उपलब्ध गराउने लेखिएको थियो', उनले लेखेका छन् ।

'खेल सकिएपछि केहि खेलाडीले ५० प्रतिशत पारिश्रमिक पाएको अवस्था छ । मैले अहिले सम्म एक रुपैयाँ पाएको छैन । यति सम्मकी खेलको दौरानमा खेलाडीलाई उपचार गराएको बिलको भरपाइ समेत पाईन । क्यानसँग सम्झौता गर्दा छिटो दिने भने पनि मलाई कति पैसा हो र कहिले दिने भनेर कसैले खोजेको पनि छैन' उनले लेखेका छन् ।

उनले पोखरा प्रिमियर लिगमा समेत काम गर्दा पैसा नपाएको बताएका छन् । 

'केहि वर्ष पहिला भएको पिपिएलमा पनि केही पारिश्रमिक र सामानको पैसा पाएको थिएन । उक्त टिमका म्यानेजर देखी मालिकसम्म गुहारे र थाके । कसैसँग पारिश्रमिक नपाएको गुनासो गर्दा यहाँ यस्तै नै हो भनेर जवाफ पाइरन्थे', उनले दुःख पोखेका छन् ।

'म एउटा श्रमिक हो र पारिश्रमिक पाउने मेरो अधिकार हो । यो अधिकार बाट मलाई बन्चित गराउनु भनेको न्याय र कानुन संगत होईन। आशा छ यो पोस्ट हजुर सम्म पुग्ने छ र मेरो पारिश्रमिक मलाई मिल्ने छ', उनले लेखेका छन् ।

नेपाल टी-ट्वान्टीको पहिलो संस्करण खेल फिक्सिङ, पारिश्रमिक, मालिकको पहिचानै नखुल्ने लगायत विभिन्न कारणले निकै विवादित बन्न पुगेको थियो ।