काठमाडौं । आयरल्यान्ड र स्कटल्यान्ड आगामी वर्ष अमेरिका र वेस्टइन्डिजमा हुने टी-ट्वान्टी विश्वकपमा छनोट भएका छन् ।
आइसीसी टी-ट्वान्टी विश्वकप युरोप क्षेत्र छनोटमा घरेलु टोली स्कटल्यान्ड र आयरल्यान्ड शीर्ष दुईमा रहँदै विश्वकपमा स्थान पक्का गरेका हुन् ।
स्कटल्यान्डले डेनमार्कलाई ३३ रनले हराउँदै विश्वकपमा स्थान पक्का गर्यो । स्कटल्यान्ड ५ खेलमा १० अंकका साथ शीर्ष स्थानमा रहँदै विश्वकपमा पुगेको हो ।
जमर्नीसँगको खेल रद्द भएसँगै आयरल्यान्ड विश्वकप खेल्ने पक्का भएको थियो । आयरल्यान्ड ५ खेलमा ४ मा जितसहित ९ अंकका साथ दोस्रो स्थानमा छ ।
आयरल्यान्ड र न्युजिल्यान्ड एक खेल अगावै विश्वकपमा छनोट भएका हुन् । आयरल्यान्ड र स्कटल्यान्डबीच शुक्रबार खेल हुनेछ । उक्त खेलको नतिजाले प्रतियोगिता विजेता निर्धारण गर्नेछ ।
नेपालले पनि आगामी नोभेम्बरमा एसिया क्षेत्रको विश्वकप छनोट आयोजना गर्नेछ । प्रतियोगितामा नेपाल, युएई, हङकङ, ओमान, बहराइन, सिंगापुर र एसिया क्षेत्र छनोट ए र बी बाट आउने दुई टोली हुनेछन् ।
एसिया क्षेत्रबाट विश्वकपमा शीर्ष दुई टोली छनोट हुनेछन् ।
