फिफा र एएफसीका प्रतिनिधि नेपालमा

काठमाडौं । अखिल नेपाल फुटबल संघ (एन्फा)को पछिल्लो अवस्था बुझ्न फिफा र एएफसीका प्रतिनिधि नेपाल आएका छन् । फिफाका साउथ एसियन डेभलोपमेन्ट म्यानेजर प्रिन्स रिफुस र एएफसीका सिनयर म्यानेजर सोनाम जिग्मी सहितको टोली नेपाल आएको हो । एन्फाको पछिल्लो वित्तिय र व्यवस्थापकीय कार्यसम्पादनको अवस्थाबारे रिफुस नेतृत्वको टोलीले रिपोर्टिङ लिनेछ ।

वित्तिय र व्यवस्थापकीय हिसाबले पछिल्लो समय खराब अवस्थाबाट गुज्रिरहेको एन्फामा फिफा प्रतिनिधिको भ्रमणलाई अर्थपूर्ण रुपमा हेरिएको छ । वित्तिय अवस्थाको कारण देखाउँदै एन्फाले पछिल्लो समय एएफसीको कार्यक्रममा नेपालको प्रतिनिधित्व बन्द गरेको छ भने एन्फा नेतृत्वले महिला फुटबल, बी र सी डिभिजन लिग सहित उमेर समुह लगायतका अन्य कार्यक्रम यस वर्ष सञ्चालन गर्न सकेन । 

लिग व्यवस्थित नभएको, बिल पेश गरेअनुसार क्लबको रकम निकासा नभएको, पदाधिकारीको तलब बढाएको, खेलाडीको पुरस्कार दिन नसकेको, संस्थागत निर्णय हुन छाडेको, नेतृत्व पारदर्शी हुन नसकेको लगायतको व्यवहोराको पत्र÷रिपोर्टिङ नेपालबाट फिफा र एएफसीमा पुग्ने गरेको छ । सोही अनुसार एन्फाको वित्तिय र व्यवस्थापकीय अवस्थाबारे जानकारी लिन फिफा प्रतिनिधि नेतृत्वको टोली नेपाल आएको बुझिएको छ । टोलीले बिहीबार र शुक्रबार एन्फाका पदाधिकारी र विभाग प्रमुखसँग छलफल गर्ने कार्यसुचि रहेको छ ।

एन्फा प्रवक्ता सुरेस साहले फिफा र एएफसी प्रतिनिधि मण्डलको टोली नेपाल आएको पुष्टि गरे । उनले फिफा प्रतिनिधि सहितको टोलीले एन्फा पदाधिकारी र विभाग प्रमुखसँग रिपोर्टिङ लिएको उल्लेख गरे । ‘एन्फाको वित्तिय अवस्था र यसको व्यवस्थापकीय पक्षबारे पदाधिकारी र विभाग प्रमुखसँग  जानकारी लिने काम भएको छ । एन्फाको व्यवस्थापकीय सुधार र रणनीतिक योजना निर्माणमा फिफा प्रतिनिधिको टोलीले सुझाव दिनेछ ।’ प्रवक्ता साहले भने । 

एन्फामा आर्थिक र वित्तिय सुधार नदेखिएको भन्दै फिफाले नेपालमा ‘कन्ट्रोल फन्डिङ’ लागू गरेको छ । वित्तिय सुधारका लागि दिएको निर्देशन एन्फाले पालना नगरेको भन्दै फिफाले नेपालमाथि ‘सफ्ट’ खालको आर्थिक प्रतिबन्ध लगाएको हो । फिफाको ‘सफ्ट’ प्रतिबन्धका कारण एन्फाले योजना अनुसारका कार्यक्रम अघि बढाउन सकेको छैन भने काम कारबाही समेत प्रभावित बनेको छ ।