लिग लिडर जावलाखेलसँग मनाङ भिड्दै

काठमाडौं । सहिद स्मारक ए डिभिजन लिग फुटबलमा आईतबादेखि १८ औं चरणका खेल सुरु हुदैछ । लिग तालिकाको शीर्ष स्थानमा रहेको जावलाखेलले मनाङ मस्र्याङ्दी क्लबसँग खेल्दैछ । 

च्यासल मैदानमा दिउँसो तीन बजे हुने खेलमा जावलाखेललाई लिग तालिकामा तीन अंकको अग्रता लिने अवसर छ । नयाँ प्रशिक्षक आएपछि जित निकाल्न संघर्ष गरिरहेको मनाङलाई शीर्ष स्थानको क्लबलाई स्तब्ध पार्ने अवसर छ ।

जावलाखेल ३० अंक सहित शीर्ष स्थानमा छ भने मनाङ २१ अंक सहित आठौं स्थानमा छ । 

आईतबारनै हुने दोस्रो खेलमा न्युरोड टिम एनआरटी र फ्रेन्ड्स क्लबबीच प्रतिस्पर्धा हुदैछ । रेलिगेशन जोनमा रहेको फ्रेन्ड्सलाई एनआरटीविरुद्ध जित निकाल्दै ‘डेन्जर जोन’ छाड्ने अवसर छ । एनआरटीलाई समेत अंक तालिकामा सुधारको मौका छ । 

एनआरटी २१ अंक सहित तालिकाको नवौं स्थानमा छ । फ्रेन्ड्स १९ अंक सहित तालिकाको पुछारदेखि दोस्रो स्थानमा छ ।