बिष्णु मनाङको मुख्य प्रशिक्षक नियुक्त

काठमाडौं । सहिद स्मारक 'ए' डिभिजन लिगको कीर्तिमानी आठ पटकको च्याम्पियन मनाङ मर्स्याङ्दी क्लबले बिष्णु गुरुङलाई मुख्य प्रशिक्षक नियुक्त गरेको छ ।

मनाङले बिहीबार एक विज्ञप्ति निकाल्दै बिष्णुलाई मुख्य प्रशिक्षक नियुक्त गरिएको जनाएको छ ।

मनाङले दुई सिजनका लागि बिष्णुलाई मुख्य प्रशिक्षक नियुक्त गरेको हो ।

क्लबका अध्यक्ष विजय घले र मुख्य प्रशिक्षक गुरुङबीच बिहीबार औपचारिक सम्झौता पत्रमा हस्ताक्षर भएको छ ।

बिष्णुले बुधबार एफसी खुमलटारको टेक्निकल डिरेक्टरबाट राजीनामा दिएका थिए ।

बिष्णुले हालै यू-१७ राष्ट्रिय महिला टिम सम्हालेका थिए ।

किरण श्रेष्ठले राजीनामा दिएपछि मनाङ मुख्य प्रशिक्षक विहीन रहेको थियो ।

'प्रतिभाशाली युवा प्रशिक्षकको नेतृत्वमा क्लबले आगामी दिन घरेलु र अन्तराष्ट्रिय फुटबलमा राम्रो नतिजा निकाल्ने विश्वास लिएका छौं । गण्डकीलाई आधार बनाएर घरेलु फुटबलमा योगदान गर्ने क्लबको उद्धेश्यमा गुरुङको नियुक्तिले थप टेवा पुग्ने विश्वास छ,' क्लबले जारी गरेको विज्ञप्तिमा भनिएको छ ।

मुख्य प्रशिक्षक नियुक्त भएपछि बिष्णुले मनाङको टोली सम्हाल्न पाउँदा खुशी लागेको बताए ।

'यस क्लबबाट खेल्ने सधै धोको रहने गर्दथ्यो । अहिले आएर मुख्य प्रशिक्षकको रुपमा नेतृत्व गर्न पाउँदा खुसी छु । युवा प्रतिभाले भरिएको यति राम्रो टिम निर्माण गरिदिएकोमा किरण श्रेष्ठलाई धन्यवाद दिन चाहन्छु,’ उनले भने ।

क्लबका अध्यक्ष विजय घलेले नयाँ प्रशिक्षकको नेतृत्वमा टोलीले सफलता हासिल गर्नेमा आफु विश्वस्त रहेको बताए ।

'घरेलु फुटबललाई विकेन्द्रिकरण गर्दै क्लबलाई व्यवसायीक बनाउने उद्धेश्यमा हामी दृढ छौं । नयाँ प्रशिक्षकको आगमनले क्लबले राष्ट्रिय र अन्तराष्ट्रिय क्लब फुटबलमा थप सफलता हासिल गर्नेमा विश्वस्त छु । मनाङ परिपक्क ढङ्गले घरेलु फुटबलमा पुरानोविरासतलाई माथि उठाउने योजनामा तयार छ,' घलेले भने ।