पुछारको दिल्लीसँग हार्यो गुजरात
काठमाडौं। साबिक बिजेता तथा शीर्ष स्थानको गुजरात टाईटन्स भारतमा जारी इन्डियन प्रिमियर लिग(आइपीएल) को ४४ औं खेलमा अंक तालिकाको पुछारमा रहेको दिल्ली क्यापिटल्ससॅंग पराजित भएको छ।
गुजरातको घरेलु मैदान अहमदाबादमा भएको खेलमा दिल्ली ५ रनले विजयी भएको हो ।
दिल्लीले दिएको १ सय ३१ रनको लक्ष्य पछ्याएको गुजरातले निर्धारित २० ओभरमा ६ विकेट गुमाएर १ सय २५ रन मात्र जोड्न सक्यो ।
गुजरातका लागि कप्तान हार्दिक पान्ड्याले ५३ बलमा ७ चौकाको सहयोगमा अविजित ५९ रनको अर्धशतकीय ईनिङ खेले पनि टोलीलाई जित दिलाउन सकेनन् ।
अभिनव मनोहरले ३३ बलमा २६ रन बनाए । राहुल तिवातियाले ७ बलमा २० रन बनाए ।
दिल्लीका लागि खलिल अहमद र इशान्त शर्माले समान २/२ तथा एनरिच नोर्किया र कुलदिप यादवले समान १/१ विकेट लिए ।
त्यसअघि टस जितेर पहिले ब्याटिङ गरेको दिल्लीले निर्धारित २० ओभरमा ८ विकेट गुमाएर १ सय ३० रन बनायो।
दिल्लीका लागि अमन खानले ४४ बलमा ३ चौका र ३ छक्काको सहयोग अविजित ५१ रनको अर्धशतकीय इनिङ खेले।
अक्षर पटेलले २७ तथा रिपल पटेलले २३ रन बनाए ।
प्रियम गर्गले १० रन बनाउॅंदा अन्य खेलाडीले दोहोरो अंकमा रन बनाउन सकेनन्।
गुजरातका लागि मोहम्मद सामीले ४ ओभरमा ११ रन खर्चिएर ४ विकेट लिए। मोहित शर्माको नाममा २ तथा राशिद खानको नाममा १ विकेट रह्यो ।
नौ खेलमा ६ जित र ३ हारका साथ १० टोली सहभागी लिगमा गुजरात १२ अंक सहित शीर्ष स्थानमा कायमै रहेको छ ।
नौ खेलमा ६ हार र ३ जितका साथ दिल्ली अंक तालिकाको पुछारमा रहेको छ ।
