सन्दीप भन्छन्, 'नेपाली दर्शक भगवानका अवतार'

काठमाडौं । नेपाली क्रिकेट टोलीका पूर्व कप्तान तथा लेगस्पिनर सन्दीप लामिछानेले नेपाली दर्शक भगवानको रुप भएको बताएका छन् ।

एसीसी प्रिमियर कपमा नेपाललाई च्याम्पियन बनाउँदै एसिया कपमा पुर्याएपछि सर्वोत्कृष्ट खेलाडी चुनिएका सन्दीपले खेलपछि प्रतिक्रिया दिदै दर्शक टिमका लागि भगवान रहेको बताए ।

नेपाली टोलीलाई जुनै स्थितिमा समेत दर्शकको भगवान रुपी साथ रहेको उनको भनाई थियो ।

'म मान्छु कि भगवानले आफ्नो अवतारमा वहाँहरुलाई पठाएको हो । एकदमै दुःखहरुको क्षण हुन्छ सबैकोमा हुन्छ । क्रिकेटमा पनि त्यसरी नै चलेको थियो । वहाँहरुले कहिल्यै पनि साथ छाड्नु हुँदैन,' सन्दीपले भने ।

'मैले अघि नै भने जस्तो वहाँहरुको एउटा ठूलो भूमिका खेल्छ । घरेलु दर्शकले एकदमै फरक पार्छ । हिजोको दिनमा ४/५ बजे सम्म मैदान पुरै भरिपूर्ण थियो । आज खेल सकिएपछि, पुरस्कार वितरणपछि अहिले पनि वहाँहरु हुनुहुन्छ,' सन्दीपले थपे ।

एसिया कपमा पुगेपछि सबैजना खुसी रहेको र पछिल्लो चार पाँच महिनाको मिहिनेतले यो सफलता प्राप्त भएको उनले बताए ।

'यसले सबै जना खुसी भएका छौ । पछिल्ला चार पाँच महिनाको मिहिनेत र कडा परिश्रमले यो प्राप्ती भएको हो । तीन चार महिनामा टिम पनि लगभग यही नै थियो,' उनले भने, 'साना साना मोमेन्टहरुले फरक पार्दछ । त्यो वल्र्ड क्रिकेट लिग टू को कुरा होस् या अहिले एसिया कपमा पुग्दा होस् । व्यबस्थापन होस् या खेलाडी या मैदानमा नदेखिने सबैको टिम प्रयासले यो सफलता पाईएको हो ।'

एसीया कप नेपालका लागि एकदमै महत्वपुर्ण रहने बताउदै उनले भने 'हामीले अहिले सम्म यती माथिल्लो तहका मुलुकहरुसँग खेल्न पाएका थिएनौ । इन्डिया पाकिस्तान हाम्राृ समूहमा नै रहेको छ । यो हाम्रा लागि नयाँ सुरुआत हुनेछ । जहाँबाट हामी पछाडी फर्कन चाहन्नौ र अगाडीको यात्रा गर्नेछौ । हामीलाई एउटा नयाँ सिकाई हुनेछ । माथील्ला टिमहरुले आफुलाई कसरी तयार गर्छ ।'

आफुहरुले एसिया कपमा सहभागीता जनाउँदा नयाँ पिढीमा थप हौसला मिल्ने सन्दीपले बताए ।

'२०१४ मा नेपालले विश्वकपमा सहभागीता जनाएकोले म नै क्रिकेट खेल्ने प्रेरित भए । मलाई लाग्छ हाम्रो एसीया कप सहभागीताले नयाँ र छुट्टै माहोल सिर्जना हुनेछ । सकेसम्म हामी त्यहाँ राम्रो प्रदर्शन गर्ने प्रयास गर्ने छौं । अब देखि हामीले निरन्तर रुपमा एसीया कप र विश्वकप खेल्ने हुनु पर्छ,' उनले भने।