काठमाडौं । भारतमा जारी इन्डियन प्रिमियर लिग (आईपीएल) क्रिकेटमा मुम्बई इन्डियन्सले लगातार तेस्रो जित निकालेको छ ।
घरेलु मैदान राजिब गान्धी स्टेडियममा सनराईजर्स हैदराबाद मुम्बईसँग १४ रनले पराजित भएको हो ।
मुम्बईले दिएको १ सय ९३ रनको लक्ष्य पछ्याएको हैदराबादले १९ दशमलब ५ ओभरमा अलआउट हुदै १ सय ७८ रन मात्र बनायो ।
हैदराबादका लागि ओपनर मंयक अग्रवालले ४१ बलमा ४ चौका र १ छक्काको सहयोगमा सर्वाधिक ४८ रन बनाए । हेनरिक केल्सनले १६ बलमा ४ चौका र २ छक्काको सहयोगमा ३६ रन बनाउँदा कप्तान एडेन माकरमले १७ बलमा २२ रन बनाए ।
कोलकत्ताविरुद्धको खेलमा हैदराबादका लागि शतक प्रहार गरेका ब्याटर ह्यारी ब्रुक भुवेनेश्वर कुमारको बलमा ७ बलमा ९ रनमा आउट भए ।
मार्को यानसनले ६ बलमा १३ रन तथा वासिंटन सुन्दर १० रनमा आउट भए ।
मुम्बईका लागि जेसन बेहरानड्राफ्ट,राईली मेरीडेथ र पियुष चावलाले समान २/२ तथा अर्जुन तेन्दुलकर र क्यामरुन ग्रिनले समान १/१ विकेट लिए ।
त्यसअघि टस हारेर पहिले ब्याटिङ गरेको मुम्बईले २० ओभरमा ५ विकेट गुमाएर १ सय ९२ रन बनाएको थियो ।
मुम्बईका लागि क्यामरोन ग्रिनले ४० बलमा ६ चौका र २ छक्काको सहयोगमा अविजित ६४ रनको अर्धशतकीय ईनिङ खेले ।
ग्रिनले ३३ बलमा आफ्नो अर्धशतक पूरा गरेका थिए । ग्रिनको आईपीएलमा यो पहिलो अर्धशतक हो ।
ओपनर ईशान किशनले ३१ बलमा ३ चौका र २ छक्काको सहयोगमा ३८ रन बनाउँदा तिलक बर्माले १७ बलमा २ चौका र ४ छक्काको सहयोगमा ३७ रन बनाए ।
चौथो विकेटका लागि ग्रीन र बर्माले २८ बलमा ५६ रनको साझेदारी गरेका थिए ।
टिम डेबिडले ११ बलमा १६ रन बनाउँदा सुर्यकुमार यादवले ३ बलमा ७ रन बनाए ।
हैदराबादका लागि मार्को यानसनले २ तथा टि नटराजन र भुवनेश्वर कुमारले समान १/१ विकेट लिए ।
पाँचौ खेलमा तेस्रो जित निकालेको मुम्बई ६ अंकका साथ १० टोली सहभागी प्रतियोगिताको छैटौं स्थानमा रहेको छ ।
पाँच खेलमा तेस्रो हार व्यहोरेको हैदराबाद अंक तालिकाको नवौं स्थानमा रहेको छ ।
