थ्री स्टार र चर्च ब्वाइजको बराबरी
काठमाडौं । सहिद स्मारक 'ए' डिभिजन लिग फुटबलमा थ्री स्टार क्लब र चर्च ब्वाइज युनाईटेडले बराबरी खेल्दै अंक बाडेका छन् ।
च्यासल मैदानमा सोमबार भएको खेलमा थ्री स्टार र चर्च ब्वाइजले गोलरहित बराबरी खेल्दै अंक बाडेका छन् ।
खेलमा दुबै टोलीले गोलको अवसर खेर फालेका थिए । बलमा पकड र आक्रामक खेल पस्किएपनि चर्च ब्वाइजले थुप्रै अवसर खेर फालेका थिए । थ्री स्टारले भने चर्चको पोस्टमा डरलाग्दो आक्रमण बुन्न सकेन ।
खेलको चौंथो मिनेटमा चर्च ब्वाइजका गगनदीप सिंहको लामो प्रहार थ्री स्टारका गोलकिपर मोहमद ताहाले पन्च गर्दै बाहिर पठाए ।
खेलको २४ औं मिनेटमा चर्च ब्वाइजका एरिक विष्टको फ्रिकिक थ्री स्टारका गोलकिपर मोहमद ताहाले पन्च गर्दै बाहिर पठाएर खतरा टारे ।
खेलको ३६ औं मिनेटमा चर्च ब्वाइजका आशिष चापागाईले गोलको अवसर गुमाए । थ्री स्टारका पिटर सेगुनबाट बल खोसेर वान भर्सेस वानमा प्रहार गरेको बल पोस्टको नजिकैबाट बाहिरिएको थियो ।
खेलको ४१ औं मिनेटमा चर्च ब्वाइजका कप्तान अनन्त तामाङले बक्स बाहिरबाटको सशक्त प्रहार थ्री स्टारका गोलकिपर मोहमद ताहाले पन्च गर्दै बाहिर पठाए ।
खेलको ७६ औं मिनेटमा चर्च ब्वाइजका मिलन राईको सशक्त प्रहार थ्री स्टारका गोलकिपर मोहमद ताहाले बचाए ।
यस बराबरीसँगै थ्री स्टारले ९ खेलमा १५ अंक जोडेको छ । थ्री स्टार छैटौं स्थानमा रहेको छ ।
चर्च ब्वाइजले १५ अंक जोडेको छ । चर्च तेस्रो स्थानमा उक्लिएको छ ।
