चितवनमा नेपाल अटो जिमखाना च्याम्पियनसिप हुने

काठमाडौं । चितवनमा पहिलो पटक नेपाल अटो जिमखाना च्याम्पियनसिपको आयोजना हुने भएको छ । चितवनमा शुक्रबार पत्रकार सम्मेलनको आयोजना गरेर प्रतियोगिताबारे जानकारी गराईएको हो ।

नेपाल अटोमोवाइल्स एसोसिएसन नासा नेपाल वाग्मती प्रदेशको आयोजनामा हुने च्याम्पियनसिप बैशाखको अन्तिम साता हुने तय भएको छ ।  

पछिल्लो एक दशकदेखि नेपालमा मोटर स्पोर्ट्सको दर्जनौ इभेन्ट सञ्चालन भएपनि चितवनमा अटो जिमखानाको पहिलो प्रतियोगिता हुन लागेको हो । यसअघि नासा नेपाल चितवनकोे नाममा टीएसडी र र्याली लगायतका प्रतियोगिता आयोजना भएका थिए । नासा नेपाल बागमती प्रदेशको आयोजनामा पहिलो पटक प्रतियोगिता हुन लागेको बागमती प्रदेश अध्यक्ष राजन पियाले बताएका छन् । 

मोटर रेसिंगको सर्ट सर्किट विधा मानिने अटो जिमखाना एक किलोमिटर ट्रयाकमा सञ्चालन गरिने आयोजकले जनाएको छ । प्रतियोगितामा १६ देखि २५ ड्राइभरले सहभागीता जनाउने बताईएको छ । 

नेपालभरबाट अनलाईनमार्फत नाम दर्ता गर्न सकिने र प्रतियोगितामा सहभागी हुन नासा नेपालको लाइसेन्स लिएको हुनुपर्ने प्रावधान राखिएको छ । प्रतियोगिताको विजेताले २७ हजार, दोस्रो हुनेले ९ हजार र तेस्रो हुनेले ३ हजार रुपैयाँ प्राप्त गर्नेछन् । प्रतियोगितामा १२ सयदेखि २ हजार सीसीसम्मका सबै प्रकारका गाडीले भाग लिन पाउनेछन् ।

कार्यक्रमका लागि राजन पियाको संयोजकत्वमा व्यवस्थापन टिम र गोपाल भट्टराईको संयोजकत्वमा आर्थिक टिम गठन गरिएको छ । करिब १४ लाख ३० हजार खर्च हुने अनुमान गरिएको प्रतियोगिताको प्राविधिक संयोजन नासा नेपालका अन्तराष्ट्रिय तालिम प्राप्त मार्शल तथा फोर ह्विलर टिमका संयोजक अनिल बरालले गर्ने बताईएको छ ।

पत्रकार सम्मेलनमा नासा नेपालका केन्द्रिय सल्लाहाकार गोबिन्द भट्टराई लगायत संघका पदाधिकारीको उपस्थिती रहेको थियो ।