अष्ट्रेलियासँग भारतको लज्जास्पद हार

काठमाडौं । पाहुना टोली अष्ट्रेलियाले दोस्रो एकदिवसीय अन्तराष्ट्रियमा घरेलु टोली भारतललाई लज्जास्पद रुपले हराएको छ ।

भारतको विसाखापटनममा भएको खेलमा पाहुना टोलीले १० विकेटको विशाल जित हात पारेको हो । 

जितसँगै पाहुना टोलीले तीन खेलको एकदिवसीय अन्तराष्ट्रियमा १-१ को बराबरी समेत गरेको छ । 

घरेलु टोलीले दिएको १ सय १८ रनको लक्ष्य पाहुना टोलीले ११ ओभरमा कुनै विकेट नगुमाई पूरा गर्यो । 

पाहुना टोलीका दुवै ओपनर अविजित रहेका थिए । ओपनर मिचेल मार्शले ३६ बलमा ६६ रनको अर्धशतकीय ईनिङ खेले  । मार्शले ६ छक्का र ६ चौका प्रहार गरेका थिए । 

अर्का ओपनर ट्राभिस हेडले ३० बलमा ५१ रनको अर्धशतकीय ईनिङ खेले । हेडले १० चौका प्रहार गरेका थिए । 

त्यसअघि टस हारेर पहिले ब्याटिङ गरेको घरेलु टोलीले २६ ओभरमा अलआउट हुँदै १ सय १७ रन बनाएको थियो । 

भारतका लागि विराट कोहलीले सर्वाधिक ३१ रन बनाउँदै आउट भए । रविन्द्र जडेजाले १६ रन बनाउँदा अक्षर पटेलले अविजित २९ रन बनाए । 

पाहुना टोलीका लागि मिचेल स्टार्कले ५ तथा सेन एबटले ३ विकेट लिए । नाथन एलिसले २ विकेट लिए । 

स्टार्कले ८ ओभरमा ५३ रन खर्चिएर ५ विकेट लिएका थिए ।

तेस्रो तथा निर्णायक एकदिवसीय खेल आगामी बुधबार हुनेछ ।