केएफएलाई हराउँदै काठमाडौं सेमिफाइनलमा

काठमाडौं । दोस्रो संस्करणको अन्तर कलेज प्याट्रियोट्स कप टी-ट्वान्टी क्रिकेट प्रतियोगितामा काठमाडौं विश्वविद्यालय सेमिफाइनल प्रवेश गरेको छ । 

समूह सी बाट अपराजित रुपमा सेमिफाइनल प्रवेश गरेको काठमाडौंले समूह चरणको अन्तिम खेलमा केएफए विजनेश स्कुललाई पराजित गरेको हो । 

मुलपानीमा भएको खेलमा काठमाडौं १० विकेटले विजयी भएको हो । 

केएफएले दिएको ७५ रनको लक्ष्य काठमाडौं विश्वविद्यालयले ८ ओभर १ बलमा कुनै विकेट नगुमाई पूरा गर्यो । 

काठमाडौंका लागि ओपनर विशाल देवकोटा र अर्जुन खड्का अविजित रहे । विशालले ३३ बलमा ५१ रनको अर्धशतकीय ईनिङ खेले । अर्का ओपनर खड्काले १७ बलमा १५ रन बनाए । 

त्यसअघि टस हारेर पहिले ब्याटिङ गरेको केएफएले १७ ओभर ३ बलमा अलआउट हुदै ७४ रन मात्र बनाएको थियो ।

केएफएका लागि समत शाहीले २१ तथा दिपेन हमालले १४ रन बनाए । काठमाडौंका लागि सार्थक न्यौपानेले ६ तथा आषिस चौलागाईले २ विकेट लिए । 

आज नै भएको अर्को खेलमा ब्लुबर्ड कलेज बिजयी भएको छ । 

आफ्नो पहिलो खेलमा जित निकाल्ने क्रममा ब्लुवर्डले ब्रिलियन्ट मल्टिपल कलेजलाई ८ विकेटले पराजित गरेको थियो ।

मुलपानी मैदानमा भएको खेलमा ब्रिलियन्टले दिएको ८६ रनको लक्ष्य ब्लुवर्डले १२ ओभर ५ बलमा २ विकेट गुमाएर पूरा गर्यो । 

ब्लुवर्डका लागि दिपक डुम्रेले ४५ तथा रोनिम तिवारीले २३ रन बनाए । ब्रिलियन्टका लागि सागर कटवाल र हिमाल कुवँरले समान १/१ विकेट लिए । 

त्यसअघि टस जितेर पहिले ब्याटिङ गरेको ब्रिलियन्टले २० ओभरमा ८ विकेट गुमाएर ८५ रन बनाएको थियो । 

ब्रिलियन्टका लागि अजय पान्डेले २५ तथा रविन्द्र कुवँरले १५ रन बनाए । ब्लुवर्डका लागि मिहोल श्रेष्ठले ३ विकेट लिए ।

ललितपुर प्याट्रियोट्स प्राइभेट कम्पिनीको आयोजनामा हुने यस संस्करणको प्रतियोगितामा १२ कलेजको सहभागीता रहने छ । 

गत बर्ष भएको पहिलो संस्करणमा ८ कलेजको सहभागीता रहेको थियो । 

मुलपानी क्रिकेट मैदानमा हुने यस प्रतियोगिताको व्यबस्थापन आडियासप नेपालले गर्नेछ । प्रतियोगिता २५ मार्च सम्म आयोजना हुनेछ । 

प्रतियोगिताको बिजेता कलेजले १ लाख र उपबिजेता कलेजले ५० हजार नगद प्राप्त गर्नेछ । 

प्रतियोगिताको उत्कृष्ट खेलाडीले २५ हजार नगद प्राप्त गर्दा बेस्ट बलर तथा ब्याटरले जनही १५ हजार पाउने छ ।

१५ खेल हुने प्रतियोगिताका हरेक खेलका म्यान अफ दि म्याचले नगद २५ सय प्राप्त गर्नेछन् ।