युनाईटेडको पोस्टमा लिभरपुलको ७ गोल

काठमाडौं । इंग्लिस प्रिमियर लिग फुटबलमा लिभरपुलले फराकिलो जित निकालेको छ ।

आइतबार राति भएको खेलमा लिभरपुलले म्यानचेस्टर युनाईटेडमाथि ७-० गोल अन्तरको जित निकालेको हो ।

लिभरपुलको जितमा कोडी गाक्पो, डार्विन नुनेज र मोहमद सलाहले २/२ गोल गरे ।

रोबर्टो फिर्मिन्होले एक गोल थपे ।

एनफिल्डमा ४३ औं मिनेटमा गाक्पोले गोल गर्दै लिभरपुललाई सुरुआती अग्रता दिलाएका थिए ।

४७ औं मिनेटमा नुनेजले गोल गर्दै लिभरपुलको अग्रात २-० को बनाए ।

खेलको ५० औं मिनेटमा गाक्पोले व्यक्तिगत दोस्रो गोल गर्दै टिमको अग्रता तेब्बर बनाए ।

खेलको ६६ औं मिनेटमा सलाहले गोल गर्दा लिभरपुल ४-० ले अघि रह्यो ।

७५ औं मिनेटमा नुनेजले व्यक्तिगत दोस्रो गोल गर्दै टिमको अग्रता ५-० को बनाए ।

खेलको ८३ औं मिनेटमा सलाहले व्यक्तिगत दोस्रो गोल गर्दा लिभरपुल ६-० ले अघि रह्यो ।

यस गोलसँगै सलाह प्रिमियर लिगमा सर्वाधिक गोल गर्ने लिभरपुलका खेलाडी बनेका छन् ।

उनले १ सय २९ गोल गर्दै रोब्बी फोव्लेरको कीर्तिमान भङ्ग गरेका हुन् ।

त्यसपछि खेलको ८८ औं मिनेटमा फिर्मिन्होले गोल गर्दै लिभरपुललाई ७-० को जित दिलाए ।

जितसँगै लिभरपुलले २५ खेलमा ४२ अंक जोडेको छ ।

लिभरपुल पाँचौं स्थानमा उक्लिएको छ ।

युनाईटेड ४९ अंक जोडेर तेस्रो स्थानमा रहेको छ ।