बाराका ५ खेलाडी 'ए' डिभिजन लिग खेल्दै

निजगढ । बाराका ५ जना खेलाडीले नयाँ सिजनको शहिद स्मारक 'ए' डिभिजन लिग फुटबल खेल्ने भएका छन्  ।

बाराका ५ खेलाडीले छुट्टाछुट्टै ३ क्लबबाट शुक्रबार सुरु हुने नयाँ सिजनको लिग खेल्न लागेका हुन् ।

बाराका रवी कुमार पासवान ,जन्मेजय धामी, अजय चौधरी,मोहित गुरुङ र युनेस चौधरीले 'ए' डिभिजन लिग खेल्दै छन् । जसमध्ये रवी विभागीय टिम नेपाल पुलिस क्लब, युनेस जावलाखेल युथ क्लब र जन्मजय,अजय र मोहित न्युरोड टिम एनआरटीबाट लिग खेल्ने छन्।

रवी पुलिसका पुराना खेलाडी हुन भने ४ जना यसै सिजनका लागि अनुबन्धित भएका हुन् ।

पुलिस रवी नेपाली राष्ट्रिय टिमका पूर्व मिडफिल्डर हुन भने बँकी ४ जना २० वर्ष मुनिको राष्ट्रिय टिमका खेलाडीहरु हुन । जन्मेजय र मोहित मिडफिल्डर र अजय डिफेन्डर हुन भने युनेस गोलरक्षकको भूमिका निर्वाह गर्छन ।

गत सिजनको 'बी' डिभिजन लिगका उत्कृष्ट गोलरक्षक युनेसले यस अघि रानीपोखरी कर्नर टिम आरसिटिबाट फुटबल खेलेका थिए भने मोहितले च्यासलबाट खेलेका थिए ।

बारामा फुटबल खेलाडीहरुको उत्पादनमा वृद्धि भईरहेको जनाउँदै बारा जिल्ला फुटबल संघका बरिष्ठ उपाध्यक्ष राजकिशोर धामीले ए डिभिजन क्लबहरुले बारामा प्रशिक्षण र खेलाडी छनोट जस्ता कार्यक्रमहरु संचालन गर्नसके अझै उत्कृष्ट खेलाडीहरु पाउने बताए ।

स्थानीय क्लबहरु आर्थिक रुपमा कमोजोर रहेकोले सरोकारवाला निकायहरुले सहयोग गरे स्थानीय स्तरमै खेलाडीहरुलाई प्रशिक्षण गराउन सकिने उपाध्यक्ष धामीले बताए ।