बहुमत कार्यसमिति सदस्यद्धारा एन्फा बैठक बहिस्कार

काठमाडौं । अखिल नेपाल फुटबल संघ (एन्फा)का बहुमत केन्द्रिय सदस्यले कार्यसमिति बैठक बहिष्कार गरेको छन् । 

नेतृत्वले पेलेरै कार्यसमिति बैठक सञ्चालन गर्न खोजेको आरोप लगाउँदै बहुमत कार्यसमिति सदस्यद्धारा बैठक बाहिस्कार गरेका हुन् । 

महासचिव किरण राई र कोषाध्यक्ष रविन्द्र जोशीलाई बर्खास्त गर्नुपर्ने माग सहित एजेण्डा थप्न निवेदन दिएका बहुमत कार्यसमिति सदस्यको माग सुनुवाई नभएपछि बुधबारको कार्यसमिति बैठकमा विवाद भएको थियो । 

एन्फाका तीन उपाध्यक्ष सहित ११ जना कार्यसमिति सदस्यले एजेण्डा थप्न माग गर्दै निवेदन दर्ता गराएका थिए । तर एन्फा अध्यक्ष पंकज बिक्रम नेम्वाङले बहुमत कार्यसमिति सदस्यको एजेण्डा कार्यसमिति बैठकमा थप्न मानेनन् । 

अध्यक्ष नेम्वाङले बहुमतका आधारमा बिहान बैठक सञ्चालन गरेर केही एजेण्डा पास गराएका थिए भने असन्तुष्ट कार्यसमितिका सदस्यले उपस्थित पुस्तिकामा हस्ताक्षर गरेका थिएनन् । बैठक सञ्चालनलाई लिएर कार्यसमितिका सदस्यबीच घम्सा घम्सीनै परेको थियो । बैठकमा सदस्य मनिष जोशी अनुपस्थित रहेका थिए । 

भोजराज शाहीले बैठक छाडेर निस्किएका थिए भने टिका लामाले निवेदन लेखेर उपस्थित पुस्तिकाबाट आफ्नो हस्ताक्षर फिर्ता लिएको बताएका थिए । 

बैठकमा सहभागी उपाध्यक्षत्रय दिर्घबहादुर केसी (कुमार), विराटजंग शाही, दिपक खतिवडा र सदस्यहरु रुपेश अधिकारी, रविन्द्र चन्द, रमेश ब्यन्जनकार, भरत बुढथापा, पेमा डोल्मा लामा र महेन्द्र क्षेत्रीले बैठक बहिष्कार गरेका हुन् । 

बैठक छाडेर पत्रकार सम्मेलन गर्दै असन्तुष्ट समुहले एन्फा कार्यसमिति बैठकको बैधानिकता नरहेको बताएका थिए । उनीहरुले अल्पमतका आधारमा निर्णय गरेर अघि बढ्ने एन्फा नेतृत्वको कदमको विरोध गरेका थिए । 

तीन उपाध्यक्ष सहित ११ जना कार्यसमिति सदस्यले महासचिव, कोषाध्यक्ष बर्खास्ती सहित विश्वकप टिकट, एएफसीका विभिन्न समितिका लागि नाम सिफारिस, उमेर समुह र राष्ट्रिय टिमका सदस्यलाई घोषित पुरस्कार वितरण गर्ने, भक्तपुर र सिन्धुली जिल्ला फुटबल संघ र साधारण सभाबाट नियुक्त भएका न्यायीक निकायको सदाचार परिक्षण लगायतका विषय एजेण्डाको रुपमा बैठकमा राख्न माग गरेका थिए ।

तर एन्फा अध्यक्ष नेम्वाङले विधानको धारा ३९ (३) अनुरुप भन्दै कार्यसमितिका बहुमत सदस्यको प्रस्तावित एजेण्डा बैठकको कार्यसुचीमा थप गर्न नसक्ने बताएका थिए । 

बहुमत कार्यसमितिको माग सुनुवाई नगरेपछि एन्फा बैठकको सुरुआतमा कार्यसमिति सदस्यबीच घम्सा घम्सी परेको थियो ।