काठमाडौं । नेकपा एमालेको भातृ संगठन नेपाल खेलकुद महासंघको अध्यक्षमा पर्शुराम बस्नेत निर्वाचित भएको घोषणा गरिएको छ । विराटनगरमा फागुन ७ गते सुरु भएको दोस्रो राष्ट्रिय महाधिवेशनमा नयाँ नेतृत्वका लागि दुई जनाको उम्मेदवारी परेको थियो । महासंघका संयोजक पर्शुराम बस्नेत र खेलकर्मी चेतनराज गिरीले नयाँ नेतृत्वका लागि उम्मेदवारी दिएका थिए ।
चुनाव गराउन विराटनगर पुगेका महासंघको अध्यक्ष मण्डलले पर्शुराम बस्नेतको नाम जबर्जस्ती ‘सर्वम्मत’ अध्यक्ष भएको घोषणा गरेको छ । दुई जनाको उम्मेदवारी रहदाँ सर्वसम्मत नेतृत्व कसरी हुन्छ ? भन्ने प्रश्नमा अध्यक्ष मण्डलका नेता भानुभक्त ढकालले खेलपाटीलाई भने, ‘सम्मेलनले सर्वसम्मत पर्शुरामलाई छान्यो । मैले बुझ्ने कुरा त्यही हो ।’
अध्यक्षमा उम्मेदवारी दिएका चेतनराज गिरीले महासंघको नेतृत्वका लागि आफ्नो मनोनयन कायमै रहेको बताएका छन् । उनले यस विषयमा पार्टी नेतृत्वसँग संवाद गर्ने उल्लेख गरेका छन् । ‘अध्यक्षमा मनोनयन दर्ता गरियो । निर्वाचन प्रक्रियामै नगएर अध्यक्ष मण्डलबाट सिंगो कार्यसमिति चयन भएको घोषणा गरिएको छ । यस विषयले पार्टीमा प्रवेश पाउने आश गरेको छु ।’ उनले भनेका छन् ।
एमालेको जनसंगठन प्रमुख समेत रहेका भानुभक्त ढकाल नेतृत्वको अध्यक्ष मण्डलले महाधिवेशनको दौरान एक जना प्रतिनिधिको दुर्घटना भएको घटनालाई आधार बनाउँदै खेलकुद महासंघमा बस्नेतलाई सर्वसम्मत अध्यक्ष घोषणा गर्दै महाधिवेशनलाई स्थगित गरेको छ । एउटा दुर्घटनामा शोक बिज्ञप्ति निकाल्दै देशभरबाट गएको प्रतिनिधिलाई बाईपास गरेर १३ दिनसम्म महासंघका औपचारिक कार्यक्रम स्थगित गरिएको घोषणा गरिएको हो ।
‘दुर्घटनामा एक जना प्रतिनिधि गुमाउनुपरेपछि शपथ ग्रहणदेखिका सम्पुर्ण कार्यक्रम स्थगित गरिएको छ । १३ दिनसम्म औपचारिक कार्यक्रम स्थगित हुन्छ । अन्य पदाधिकारी सहितको कार्यसमिति काठमाडौंमा टुङ्गो लगाईनेछ ।’ ढकालले भने ।
एमालेको खेलकुद महासंघमा नयाँ नेतृत्व चयन गर्न देशभरबाट प्रतिनिधि विराटनगर पुगेका थिए । तर अध्यक्ष मण्डलले एकलौटी रुपमा सर्वसम्मत नेतृत्व चयनको घोषणा गरेपछि निराश भएर प्रतिनिधि र पदाधिकारीका आकांक्षी घर फर्किएका छन् । अध्यक्ष मात्र नभएर उपाध्यक्ष, महासचिव, सचिवमा समेत धेरै उम्मेदवारले मनोनयन दर्ता गराएका थिए । तर अध्यक्ष मण्डलले प्रतिनिधि दुर्घटनाको कारण देखाउँदै काठमाडौं गएर सर्वसम्मत पदाधिकारी चयन गर्ने भन्दै महाधिवेशन स्थगित गरेका छन् ।
‘अध्यक्षका दुई जना उम्मेदवार रहदा रहदै सर्वसम्मत भन्दै नेतृत्वको घोषणा गरियो । विधि र विधान नमान्ने नेता भएपछि यस्तै हुने रहेछ । हो–हल्लाका बीच अधिवेशन स्थगित भएको घोषणा भयो ।’ एक महाधिवेशन प्रतिनिधिले, ‘खेलकुद पार्टीका नेताले रत्यौती खेल्ने ठाउँ जस्तो भो ।’
पछिल्लो समय एमालेभित्रको आन्तरिक लोकतन्त्र मर्दै गएको भन्दै सार्वजनीक आलोचना हुन थालेको छ । एमालेको खेलकुद हाँक्ने भातृ संगठन खेलकुद महासंघको विराटनगर अधिवेशनमा नेतृत्वको नाम खल्तीबाट चयन भएपछि पार्टीभित्र पनि असन्तुष्टि देखिएको छ ।
