ठूलो कीर्तिमानको नजिक नेपाली टोली 

काठमाडौं । नेपालले घरेलु मैदानमा जारी रहेको आईसीसी विश्वकप लिग टू को खेलमा भोली मंगलबार स्कटल्याण्डको सामना गर्ने छ । 

२०१९ देखि सुरु विश्वकप लिग टूमा स्कटल्याण्डले मंगलबार आफ्नो अन्तिम खेल खेल्दैछ । तीन खेल बाकीँ रहदै लिग टू को च्याम्पियन बनेको स्कटल्याण्डले मंगलबारको नेपालको खेल पछि नै लिग टू ट्रफि पाउने छ ।

शुक्रबारको पहिलो खेलमा स्कटल्याण्डलाई ३ विकेटले हराएको नेपाल मंगलबारको खेलमा पनि सोही लयलाई निरन्तरता दिन चाहान्छ । यदी सो खेल जितेमा नेपालले नयाँ कीर्तिमान बनाउने छ । नेपाल २०१९ देखि सुरु आईसीसी विश्वकप लिग टूमा आफ्नो घरेलु भुमीमा आयोजित एक त्रिदेशीय सिरिजमा शतप्रतिशत नतिजा निकाल्ने पहिलो टोली बन्नेछ । 

मंगलबारको खेलमा स्कटल्याण्डलाई पराजित गर्न सकेमा नेपालले आफ्नो एकदिवसीय क्रिकेटको ईतिहासमा पहिलो पटक लगातार चार खेल जित्नेछ । मंगलबारको खेल जितेमा विश्वकप लिग टू को पूरा सिरिजमा स्कटल्याण्डलाई लगातार दुई खेलमा पराजित गर्ने पहिलो टोली पनि नेपाल बन्नेछ । 

लिग टूमा रहेको समिकरण

स्कटल्याण्ड ३५ खेलमा २४ मा जित र ९ मा हारका साथ ५० अंकका साथ शीर्ष स्थानमा छ । स्कटल्याण्डले गत बुधबार नामिबियासँगको जितसँगै ३ खेल अगाबै विश्वकप लिग टूको च्याम्पियन बनेको थियो । जिम्बाबेमा हुने विश्वकप छनोटमा समेत स्कटल्याण्डले स्थान पक्का गरिसकेको छ । 

यस्तै ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । नेपालले नामिबियालाई लगातार दुई खेलमा पराजित गरेसँगै विश्वकप लिग टू को शीर्ष ३ मा स्थान सुरक्षित गरिसकेको छ । जिम्बाबेमा हुने विश्वकप छनोटमा समेत ओमानले स्थान पक्का गरिसकेको छ । 

नामिबिया ३४ खेलमा १८ मा जित र १५ मा हारका साथ ३७ अंकका साथ तेस्रो स्थानमा छ । बाँकी रहेका ३ खेलको प्रदर्शन र अन्य टोलीको नतिजामा उसको आगामी यात्राको तय हुनेछ । 

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । सिधा विश्वकप छनोट खेल्ने सम्भावना समाप्त भईसकेको अमेरिका नामिबियामा आयोजना हुने विश्वकप छनोट प्लेअफको तयारीमा रहेको छ । 

यूएई २६ खेलमा १२ मा जित र ११ मा हारसहित २७ अंकका साथ पाँचौं स्थानमा छ । बाँकी १० खेलमा प्रदर्शन र अन्य टोलीको नतिजाको आधारमा यूएईको आगामी यात्राको तय हुनेछ । 

नेपाल २७ खेलमा ११ मा जित र १४ मा हारसहित २४ अंकका साथ छैटौं स्थानमा छ । बाँकी रहेको ९ खेल तथा अन्य टोलीको नतिजाको आधार नेपालको यात्रा तय हुनेछ । शीर्ष तीनमा पर्दै सिधा विश्वकप छनोटमा स्थान बनाउँन नेपालले सबै खेल जित्नुपर्ने हुन्छ । 

पपुवा न्युगिनी २८ खेलमा २ मा जित र २५ मा हारसहित ५ अंक जोड्दै पुछारमा छ । शीर्ष तीनमा पर्ने सम्भावना गुमाईसकेको पपुवा न्युगिनी विश्वकप छनोटको प्लेअफको तयारीमा रहेको छ ।  

नेपालको बाँकी खेल

२०१९ देखि सुरु विश्वकप लिग टू खेलमा नेपालले ९ खेल खेल्न बाकीँ रहेको छ । चार खेल यूएईमा गएर खेल्ने नेपालले बाकीँ पाँच खेल घरेलु मैदानमा खेल्नेछ । 

नेपालले अब घरेलु मैदानमा मंगलबार स्कटल्यान्डसँग यो सिरिजको अन्तिम खेल खेल्नेछ ।  

त्यस लगत्तै यूएई भ्रमणमा जाने नेपाली टोलीले त्यहाँ घरेलु टोली तथा पपुवा न्युगिनिसँग खेल्नेछ । नेपालले २७ फेब्रुअरी (फागुन १५) मा पपुवा न्युगिनीसँग खेलेर आफ्नो यूएई भ्रमणको सुरुआत गर्नेछ ।

मार्च २ (फागुन १८) मा घरेलु टोलीसँग नेपालको खेल हुनेछ । मार्च ३ (फागुन १९) मा पपुवा न्युगिनीसँग तेस्रो खेल खेल्ने नेपालले यूएई भ्रमणको अन्तिम खेलमा मार्च ६ (फागुन २२) मा घरेलु टोली यूएईसँग खेल्नेछ । 

यूएई भ्रमणको केही समयमा नै नेपालले आफ्नो घरेलु मैदानमा नेपालले यूएई र पपुवा न्युगिनीलाई अन्तिम विश्वकप लिग टू खेलका लागि निमन्त्रणा दिने छ । 
 
टियु मैदानमा आयोजना हुने सो खेलको पहिलो खेलमा नेपालले मार्च ९ (फागुन २५) मा पपुवा न्युगिनीसँग खेल्नेछ । मार्च १२ (फागुन २८) मा यूएईसँग नेपालले दोस्रो खेल खेल्नेछ । मार्च १३ (फागुन २९) मा पपुवा न्युगिनीसँग नेपालले पुनः खेल्नेछ । विश्वकप लिग टूको अन्तिम खेलमा मार्च १६ (चैत २) मा यूएईसँग खेल्नेछ ।