यूएईविरुद्धको सिरिज अफगानिस्तानलाई

काठमाडौं । पाहुना टोली अफगानस्तानले यूएईविरुद्धको टी-ट्वान्टी सिरिज जितेको छ । 

आईतबार राती सकिएको तेस्रो तथा अन्तिम खेलमा पाहुना टोली ६ विकेटले विजयी भएसँगै अफगानिस्तानले सिरिज २-१ ले जितेको हो । 

शेख जायद क्रिकेट स्टेडियम अबुधावीमा भएको खेलमा यूएईले दिएको १ सय ६४ रनको लक्ष्य अफगानीस्तानले ५ बल बाकीँ रहदै ४ विकेट गुमाएर पूरा गर्यो । 

अफगानिस्तानको जितमा इब्रहिम जार्डान र करिम जन्नतले अर्धशतकीय ईनिङ खेले । जार्डानले ५१ बलमा ६० रनको अविजित ईनिङ  खेले । उनले ५ चौका तथा १ छक्का प्रहार गरे ।

जन्नतले २२ बलमा ५६ रनको विस्फोटक ईनिङ खेले । उनले ४ चौका र ५ छक्का प्रहार गरे । 

जन्नत र जार्डानले ५ औ विकेटका लागि ८०  रनको अविजित साझेदारी गरे । 

रहिमउल्लाह गुर्वाज २० रनमा आउट हुँदा अफसर जाजइले १३ रन बनाए । 

यूएईले १६ रन अतिरिक्त स्वरुप दिएको थियो । 

त्यसअघि पहिले ब्याटिङ गरेको घरेलु टोलीले २० ओभरमा ६ विकेट गुमाएर १ सय ६३ रन बनायो । 

घरेलु टोलीका लागि मुहम्मद वासिम र वृत्य अरबिन्दले अर्धशतकीय ईनिङ खेले । वासिमले ५० बलमा ७५ रन बनाए । उनले ८ चौका र ३ छक्का प्रहार गरे । 

अरबिन्दले ५३ बलमा ५९ रन बनाए । उनले ७ चौका तथा १ छक्का प्रहार गरे । 

वासिम र अरबिन्दले पहिलो विकेटका लागि १ सय २९ रनको साझेदारी गरे । उसका अन्य ब्याटरले दोहोरो अंकमा रन बनाउन सकेनन् । 

अफगानिस्तानले १५ रन अतिरिक्तमा दिएको थियो ।