इलाम । विराट गोल्डकप ट्रष्टले आगामी चैत्र ६ गतेबाट छैटौ संस्करणको विराट गोल्डकप आयोजना गर्ने जनाएको छ।
ट्रष्टले पत्रकार सम्मेलन गरेर प्रतियोगिताको मिति सार्वजनिक गरेको हो । चैत्र १४ गते सम्म हुने भनिएको प्रतियोगिताको मुख्य संयोजकको रुपमा विराटनगर महानगरपालिका प्रमुख नागेश कोइराला रहने ट्रष्टले जनाएको छ ।
प्रदेश १ को एक मात्र रात्रीकालिन फुटबल प्रतियोगिताको रुपमा पहिचान बनाएको गोल्डकपमा अन्तराष्ट्रिय सहित ८ टोलीको सहभागिता रहने जनाइएको छ । विराटनगर स्थित सहिद रंगशालामा संचालन हुने प्रतियोगिताको पुरस्कार राशीमा समेत वृद्धि गरिएको छ ।
२०७८ बैशाखमा सम्पन्न पाँचौँ सस्करण विजेता एपीएफले १५ लाख र उपविजेता पञ्जाब पुलिस क्लब भारतले ७ लाख ५० हजार पुरस्कार पाएको थिए ।
महेन्द्र गोल्डकपका नाममा २०१८ सालदेखि सञ्चालन हुँदै आएको यो प्रतियोगिता २०६२÷६३ को राजनीतिक परिवर्तनपछि २०६७ देखि विराट गोल्डकपको नाममा सञ्चालन हुँदै आएको छ । गोल्डकप ट्रष्टले प्रतियोगिताको मिति सार्वजनिक गरेपनि एन्फाले आयोजनाको लागि विराट गोल्डकपलाई मिति दिएको छैन् ।
एन्फा महसचिव किरण राईका अनुसार केही गोल्डकप प्रतियोगिताले चैत्रको दोश्रो सातासम्म सम्पन्न गर्ने मिति मागेका छन् । तर एन्फाले अहिलेसम्म कसलाई आयोजना बारेमा अनुमती दिने भन्ने निर्णय गरेका छैन ।
'केही गोल्डकप आयोजकले प्रतियोगिताको लागि चैत्रको मध्यसम्मको मिति मागेर निवेदन दिनुभएको छ । हामीले कसलाई दिने भन्ने निर्णय गरेका छैनौ । केही दिनभित्र आयोजना क कसलाई दिने भन्ने बारेमा निर्णयमा पुग्छौ ।’ उनले भने, ‘ सहिद स्मारक लिगलाई केही दिन स्थगित गरेर पनि मोफसलको फुटबल चलायमान बनाउने पक्षमा छौ । केही मुख्य प्रतियोगिता आयोजना हुन्छ तर कुन कुन प्रतियोगिता भन्ने बारेमा अहिले भन्न सकिएन् ।’
प्राप्त जानकारी अनुसार विराटले मागेको मितिमा इलामको माईभ्याली गोल्डकप, बाराको सिमरा गोल्डकप सहित केही प्रतियोगिता आयोजकले एन्फामा निवेदन दिएका छन् ।
