काठमाडौं । नेपाली राष्ट्रिय फुटबल टिमका पूर्व मिडफिल्डर रमेश ज्ञवालीले स्पेनिस क्लब रियल मड्रिडको युनिभर्सिटीमा फुटबल कोचिङ र म्यानेजमेन्ट कोर्स गर्ने भएका छन् ।
रानीपोखरी कर्नर टिम (आरसीटी) का पूर्व कप्तान समेत रहेका ज्ञवालीले रियल मड्रिड ग्राजुएट स्कुल युनिभर्सिडाड युरोपियामा मास्टर्स डिग्रीको कोर्स गर्ने भएका हुन् ।
ज्ञवालीले युनिभर्सिडाड युरोपियामा इन्टरनेसनल मास्टर्स इन फुटबल कोचिङ एण्ड म्यानेजमेन्ट विषयमा मास्टर्स गर्ने छन् ।
यस कोर्समा प्रशिक्षक र म्यानेजर दुवैको विषय समावेश गरिएको हुन्छ । कोर्स सकिएपछि उनले तीन महिनाको इन्टरसिप गर्ने छन् ।
एक वर्ष कोर्सका लागि ज्ञवाली यसै हप्ता स्पेनको मड्रिड जाने छन् ।
'रियल मड्रिडको युनिभर्सिटीमा पढ्न पाउने अवसर पाएको छु । यसलाई मैले ठुलो अवसरको रुपमा लिएको छु,' खेलपाटीसँग कुरा गर्दै ज्ञवालीले भने,' तीन चरणको अन्तर्वार्तापछि कोर्स गर्नका लागि छनोट भए ।'
यस कोर्स २०२२ को अक्टोबरबाट सुरु भएपनि भिषा समस्याको कारण ज्ञवाली ढिला जान लागेका हुन् ।
'कोर्स सुरु भईसकेको छ । भिषाको कारण ढिला भयो । अनलाइनमा कोर्स गरिरहेको छु,' उनले भने ।
कोर्स सकिएपछि ज्ञवाली आफुले युरोपमा सिकेको कुरा नेपाली फुटबलमा दिन चाहन्छन् ।
गुल्मी पुर्ख्यौली घर भएका ज्ञवालीले सन् २००१ मा विश्वकप छनोट अन्तर्गत इराक र मकाउविरुद्ध नेपालको राष्ट्रिय टिमबाट खेलेका थिए ।
५० वर्षीय ज्ञवालीले इंग्ल्यान्ड एफएबाट पहिलो, दोस्रो र तेस्रो लेभलको कोचिङ कोर्स गरिसकेका छन् ।
यस्तै पाकिस्तानबाट उनले एएफसी 'सी ' लाइसेन्स कोर्स गरिसकेका थिए ।
ज्ञवालीले आफ्नै खर्चमा रियलको युनिभर्सिटीका कोर्स गर्न लागेका हुन् ।
कोर्सका लागि मात्रै १४ हजार युरो भन्दा बढी शुल्क लाग्ने र कोर्स सकिदा ३० हजार युरो खर्च हुने उनले बताए ।
ब्रिटिस स्कुलमा पिई टिचर रहेका ज्ञवालीले फ्रेन्ड्स क्लबबाट व्यवसायिक फुटबलको सुरुआत गरेपनि त्यसपछि उनले आरसीटीका लागि मात्र खेलेका थिए ।
ज्ञवालीले २०५३ देखि २०६३ सम्म आरसीटीबाट खेलेका थिए । ज्ञवालीले आरसीटीबाट शीर्ष डिभिजन लिग भने जित्न सकेनन् । तर, शुभजन्मोत्सव कप लगायत उपाधि जितेका थिए ।
आरसीटीमा ७ नम्बर जर्सी लगाउने उनले कुनैपनि खेलमा बेन्चमा बिताउनु परेको थिएन ।
अर्जेन्टिनाका फुटबलर गाब्रिएल बाटिस्टुटा जस्तो देखिने हुँदा उनलाई समेत बाटिस्टुटा भनेर सम्बोधन गरिन्थ्यो ।
