यू-१९ राष्ट्रिय क्रिकेट हालसम्म सर्वाधिक रन बनाउँने पाँच ब्याट्सम्यान

काठमाडौं । यू-१९ राष्ट्रिय क्रिकेट प्रतियोगिताको फाइनल समिकरण पूरा भईसकेको छ।

फाइनलमा सुदुरपश्चिम प्रदेश र लुम्बिनी प्रदेशबीच प्रतिस्पर्धा हुनेछ । फाईनल खेल सोमबार टियू मैदानमा हुनेछ । 

यस प्रतियोगितामा अपेक्षा गरिएका केही ब्याटरबाट रन नबन्दा केही नयाँ प्रतिभा समेत देखिएको छ । प्रतियोगिताको समूह चरणका खेलहरु सकिदा सम्म सर्वाधिक रन बनाउँने ब्याट्सम्यानको र्शीष ५ मा रहेको नाम यसप्रकार रहेको छ :

१) प्रतिक श्रेष्ठ 

बागमतीका ब्याटर रहेका श्रेष्ठले प्रतियोगिताको ६ खेलमा १ शतक सहित २ सय ५१ रन बनाए । उनले आफ्नो पहिलो खेलमा गण्डकी प्रदेशको टोलीविरुद्ध ८ रन बनाएका थिए । दोस्रो खेलमा प्रदेश१ को टोलीविरुद्ध अविजित १ सय ४२ रन बनाए ।

तेस्रो खेलमा मधेश प्रदेशको टोलीविरुद्ध ३० रन बनाएका थिए । चौथो खेलमा कर्णाली प्रदेशविरुद्ध ब्याटिङको अवसर नपाएका श्रेष्ठले पाँचौ खेलमा लुम्बिनी प्रदेशविरुद्ध २७ रन बनाएका थिए । बागमतीको छैठौं तथा समूह चरणको अन्तिम खेलमा प्रतिकले ४४ रन बनाएका थिए । 

सर्वाधिक रन बनाउँने ब्याट्सम्यानको र्शीषस्थानमा रहेका प्रतिक आबद्ध बागमती प्रदेश फाईनल प्रवेश गर्न सकेन । 

२) अर्जुन कुमाल 

गण्डकी प्रदेशका भरपर्दा ब्याटर कुमालले यस प्रतियोगिताको ६ खेलमा ९८ रनको सर्वाधिक स्कोरको सहयोगमा  २ सय १० रन बनाएका थिए । २ सय १० रनका साथ कुमाल यस सूचीको दोस्रो स्थानमा रहेका छन् । कुमालले बागमतीसँगको पहिलो खेलमा ९८ रनको योगदान गरे । दोस्रो खेलमा उनले प्रदेश१ विरुद्ध २२ रन बनाएका थिए । तेस्रो खेलमा सुदुरपश्चिम प्रदेशका विरुद्ध कुमालले २० रनको योगदान गरे । 

चौथो खेलमा लुम्बिनी प्रदेशसँगको खेलमा अर्जुनले ९ रन बनाएका थिए । समूह चरणको पाँचौ खेलमा कुमालले कर्णाली प्रदेशकाविरुद्ध ५० रन बनाएका थिए । समूह चरणको अन्तिम खेलमा मधेश प्रदेशसँगको खेलमा कुमालले ११ रन बनाएका थिए । कुमाल आबद्ध गण्डकी प्रदेशले समूह चरणमा नै आफ्नो यात्रा समाप्त गरेको छ । 

३) आकाश त्रिपाटी 

लुम्बिनी प्रदेशका ब्याटर आकाशले यस प्रतियोगिताको ६ खेलमा १ सय ९९ रन बनाएका छन् । त्रिपाटी यस सूचीको तेस्रो स्थानमा रहेका छन् । त्रिपाटीले सुदुरपश्चिमसँगको पहिलो खेलमा २२ रन बनाएका थिए । दोस्रो खेलमा कर्णाली प्रदेशकाविरुद्ध त्रिपाटीले अविजित ५२ रन बनाएका थिए । गण्डकी प्रदेशसँगको तेस्रो खेलमा त्रिपाटीले ४५ रन बनाएका थिए । चौथो खेलमा बागमती प्रदेशविरुद्ध ४० रन बनाएका थिए । 

पाचौं खेलमा प्रदेश-१ विरुद्ध उनले १७ रन बनाएका थिए । छैठौं खेलमा मधेश प्रदेशविरुद्ध आकाशले २३ रन बनाएका थिए । साबिकको बिजेता लुम्बिनी फाईनल प्रवेश गरेको छ । 

४) अनुराग सिंह

सुदुरपश्चिम प्रदेश टोलीका कप्तान सिंहले यस प्रतियोगिताको समूह चरणका ६ खेलमा ८३ रनको सर्वाधिक व्यक्तिगत स्कोरबाट १ सय ८० रन बनाएका छन् । कर्णाली प्रदेशसँग भएको पहिलो खेलमा कप्तान सिंहले १० रन बनाएका थिए । लुम्बिनी प्रदेशसँगको आफ्नो टोलीको दोस्रो खेलमा उनले ९ रनको योगदान गरेका थिए । 

तेस्रो खेलमा गण्डकी प्रदेशका विरुद्ध महत्वपूर्ण ३७ रन बनाई आउट भए । चौथो खेलमा प्रदेश१ विरुद्ध सिंहले ८३ रन जोडेका थिए । पाँचौ खेलमा मधेश प्रदेशविरुद्ध कप्तान सिंहले अविजित २ तथा समूह चरणको अन्तिम खेलमा बागमती प्रदेशका विरुद्ध अविजित ३९ रन बनाएका थिए । आफ्नो कप्तानीमा सिंहले सुदुरपश्चिमलाई अपराजित रुपमा फाईनलसम्म पुर्याएका छन् ।

५) उत्तम थापा मगर 

बागमती टोलीका सदस्य थापा मगरले समूह चरणका ६ खेलमा ८७ रनको सर्वाधिक व्ययक्तिगत रनमा १ सय ७३ रन बनाएका छन् । गण्डकी प्रदेश विरुद्धको पहिलो खेलमा उत्तमले ८७ रनको ईनिङ खेलेका थिए । समूह चरणको दोस्रो खेलमा प्रदेश१ विरुद्ध ० रनमा नै आउट भएका थापाले मधेशविरुद्धको तेस्रो खेलमा ७१ रनको योगदान गरेका थिए । 

कर्णाली प्रदेशसँग बागमतीको चौथो खेलमा उनले १ रन बनाएका थिए । लुम्बिनीसागको पाँचौ खेलमा थापाले ११ रन जोडेका थिए । समूह चरणको अन्तिम खेलमा उनले सुदुरपश्चिम प्रदेशका विरुद्ध ३ रन बनाएका थिए ।