काठमाडौं । अखिल नेपाल फुटबल संघ (एन्फा)ले प्रवक्तालाई कर्मचारी सरह मासिक तलब दिने निर्णय गरेको छ ।
एन्फाको मंगलबार बसेको तेस्रो कार्यसमिति बैठकले प्रवक्ता सुरेश साहलाई मासिक ६५ हजार तलब दिने निर्णय गरेको हो ।
आर्थिक संकटबाट गुज्रिरहेको एन्फाले स्वयमसेवक भुमिकामा रहेका प्रवक्तालाई मासिक तलब दिने निर्णय गरेको हो ।
यसअघि प्रवक्ता नियुक्ति गर्दा संस्थालाई आर्थिक भार नपर्ने गरि पदाधिकारी नियुक्ति गर्ने सहमती बनेको थियो ।
अघिल्लो कार्यसमितिको सहमतीलाई उल्लंघन गर्दै एन्फाले प्रवक्ताको जिम्मेवारीमा रहेका सुरेश साहलाई कर्मचारी सरह मासिक तलबको व्यवस्था गरेको हो ।
साह तिनै व्यक्ति हुन्, जसले फुटबलमा आर्थिक सुशासनको पक्षमा सामाजिक सञ्जालमा वकालत गर्दै आएका थिए । स्वयम सेवक रुपमा फुटबल विकास गर्ने नारा सहित प्रवक्ताको जिम्मेवारी लिएका साहलाई मासिक ६५ हजार तलब दिने निर्णय एन्फाले गरेको हो ।
यसअघि एन्फाको प्रवक्ताको जिम्मेवारी किरण राईले पाएका थिए । उनले समेत तत्कालिन समयमा मासिक ४० हजारसम्म तलब बुझ्ने गरेका थिए । तत्कालिन समयमा एन्फा चुनावको मिति नजिकिएसँगै उनले प्रवक्ता पदबाट राजीनामा दिएर वर्तमान एन्फा अध्यक्ष पंकज बिक्रम नेम्वाङको प्यानलमा उभिएका थिए ।
उनै पूर्व प्रवक्ता राईलाई वर्तमान अध्यक्ष नेम्वाङले कार्यसमितिको पहिलो बैठकमार्फत महासचिवमा नियुक्त गरेका छन् । महासचिवमा नियुक्त भएपछि राईले मासिक १ लाख २० हजार रुपैयाँ तलब लिदै आएका छन् । वर्तमान अध्यक्ष नेम्वाङ र महासचिव राई तिनै व्यक्ति हुन्, जसले तत्कालिन महासचिव इन्द्रमान तुलाधरले लाख बढी तलब लिने गरेको भन्दै सार्वजनीक रुपमा आलोचना गर्ने गरेका थिए ।
दुवैले महासचिवको तलब धेरै भएको भन्दै रकम घटाउनुपर्ने प्रस्ताव राख्दै आएका थिए । तर नेतृत्वमा पुगेपछि सोही तलब स्केललाई वर्तमान नेतृत्व र महासचिव राईले निरन्तरता दिएका छन् भने आर्थिक रुपमा कमजोर संस्थाको प्रवक्तालाई मासिक ६५ हजार रुपैयाँको आर्थिक भार थपेका छन् ।
