काठमाडौं । राष्ट्रिय खेलकुद परिषद् (राखेप)का पूर्व सदस्य सचिव युवराज लामाले नवौं राष्ट्रिय खेलकुद प्रतियोगिता कर्मकाण्डी रुपमा सम्पन्न भएको टिप्पणी गरेका छन् । उनले गलत समयमा प्रतियोगिताको आयोजना गरेर कर्मकाण्डी रुपमा नवौं राष्ट्रिय खेलकुद सम्पन्न गरिएको धारणा राखेका छन् ।
‘यो समयनै ठिक थिएन । गर्नै नहुने समयमा प्रतियोगिता गरियो । सबै चार्ड पर्वको मुडमा हुन्छ । लगत्तै खेलाडीले आफ्नो उत्कृष्ट प्रर्दशन दिन सक्दैन ।’ पूर्व सदस्य सचिव लामाले खेलपाटीसँग भने, ‘नितान्त गलत प्रवृतिका साथ गरिएको आयोजना हो । कर्मकाण्डी रुपमा सकाउने उद्धेश्य मात्र देखियो । जे जसरी लाभ लिन सकिन्छ, त्यो लिएर प्रतियोगिता गर्ने नियत देखियो ।’
पूर्व सदस्य सचिव लामाले अधिकांश प्रदेशमा खेलाडी छनोट नगरेर सिधै टिपेर राष्ट्रिय खेलकुदमा समावेश गरिनु गलत भएको बताए । ‘अधिकांश प्रदेशमा खेलाडी छनोटनै भएन । केही खेलमा भए । तर अधिकांश प्रदेश र खेलका खेलाडी टिपेर खेलाउने काम भएको छ ।’ उनले भने । ‘खेलाडीले क्लोज क्याम्प हुनपर्दथ्यो । ग्रासरुट छनोट नहुने वित्तिकै प्रतियोगिताको औचित्यनै भएन ।’ लामाले थपे ।
पूर्व सदस्य लामाले नवौं राष्ट्रिय अहिलेसम्मकै खराब ब्यवस्थापनमा आयोजना भएको टिप्पणी गरेका छन् ।
‘गण्डकीलाई जुन जिम्मेवारी दिनुपर्दथ्यो, त्यो भएन । प्रदेश सरकारले अपनत्वनै लिन सकेन । संघहरुलाई सक्रिय भुमिका दिन पर्दथ्यो । केही पूर्वाधार बन्न पर्दथ्यो ।’ उनले भने, ‘प्रदेशलेनै छनोट गरे । खेलाडी तयार गरे । संघको ६० करोडको बजेट कहाँ गयो भन्ने हो ।’
‘यत्रो लगानी गरेर यो प्रकारको व्यवस्थापन हुन्छ भने राष्ट्रिय प्रतियोगिता नगर्दा हुन्छ ।’ लामाले भने ।
तत्कालिन नेकपा माओवादी सरकारको पालामा लामाले राखेपको नेतृत्व सम्हाल्ने जिम्मेवारी पाएका थिए । उनलाई नेपाली खेलकुद इतिहासको सफल सदस्य सचिवको रुपमा लिने गरिन्छ । वर्षभरी राष्ट्रिय टिम तयारीको नविन योजना, खेलकुद पूर्वाधार निर्माणदेखि खेलकुदमा थिती बसाल्ने नेतृत्वदायी भुमिकाका कारण लामालाई घरेलु खेलकुदमा सफल सदस्य सचिव मानिन्छ ।
माओवादी केन्द्रका नेता समेत रहेका लामाले गण्डकी प्रदेशमा जसरी राष्ट्रिय प्रतियोगिताका आगामी संस्करण गर्न आवश्यक नरहेको समेत सुझाव दिएका छन् ।
‘गण्डकी प्रदेशमा जसरी लथालिङ्ग र भताभुङ्ग गरेर प्रतियोगिता गरिएको छ । यसरी राष्ट्रिय प्रतियोगितानै गर्न आवश्यक छैन ।’ उनले भने, ‘नितान्त कर्मकाण्डी रुपमा गरिएको आयोजनाले खेलकुदमा माओवादीको शाख गिरेको छ ।’
यो पनि, नवौं राष्ट्रिय खेलकुद : कर्मकाण्डी आयोजना
