नवौं राष्ट्रिय : स्क्वासको महिलामा सेमिफाइनल समीकरण पूरा

पोखरा । नवौं राष्ट्रिय खेलकुद अन्तरगत पोखरा रंगशालास्थित एसआरए स्क्वास कोर्टमा जारी प्रतियोगितामा महिलातर्फको सेमिफाइनलमा गण्डकीकी कृष्णा थापामगर, बागमतीकी विपना ब्लोन, स्वस्तानी श्रेष्ठ र भावना सुनुवार प्रवेश गरेकी छिन् ।

समूह ‘क’बाट लिग विजेता बनेकी गण्डकीकी कृष्णा थापामगर र उपविजेता बनेकी बागमतीकी भावना सुनुवार अन्तिम चारमा प्रवेश गरिन् ।

यसैगरि समूह  ‘ख’ बाट बागमतीकी विपना ब्लोन र सोही प्रदेशकै स्वस्तानी श्रेष्ठ सेमिफाइनलमा प्रवेश गरेकी हुन् ।

अब गण्डकीकी कृष्णा थापामगरले बागमतीकी स्वस्तानी श्रेष्ठसँग प्रतिस्पर्धा गर्नेछिन् । भने  बागमतीकी विपना ब्लोन सोही प्रदेशकै भावना सुनुवारसँग भिड्नेछन् ।

स्क्वास प्रतियोगिता संयोजक लोकेन्द्रमान सिं भण्डारीका अनुसार सेमिफाइनल खेल भोलि (बुधबार) सम्पन्न हुनेछ ।

यसैगरि पुरुषतर्फका टिम इभेन्ट अन्तर्गत अन्तिम चारमा गण्डकी प्रदेश, बागमती प्रदेश, लुम्बिनी प्रदेश र सशत्र प्रहरी बल प्रवेश गरेका छन् ।

यसअघि पुरुषतर्फको व्यक्तिगत विधामा गण्डकीका अमृत थापामगरले स्वर्ण जितिसकेका छन् । भने बागमतीका अरहन्त सिम्हले रजत पदक, सोही प्रदेशकै अमिर ब्लोनले र गण्डकीका दिपक थापाले कास्य पदक प्राप्त गरेका थिए ।

उक्त प्रतियोगितामा २ विभागीय र ५ प्रदेशको गरि पुरुषतर्फ कुल २५ जना र महिलातर्फ ७ जनाको सहभागिता रहेको छ ।