नवौं राष्ट्रिय : अपराजित एपीएफ सेमिफाईनलमा
काठमाडौं । नवौं राष्ट्रिय खेलकद प्रतियोगिता अन्तर्गतको महिला क्रिकेट प्रतियोगितामा विभागीय टोली नेपाल एपीएफ क्लब अपराजित रहदै सेमिफाईनल पुगेको छ ।
पोखरामा आईतबार भएको खेलमा यस अघि नै सेमिफाईनल पुगेको नेपाल एपीएफ क्लबले आफ्नो चौथो खेलमा सुदुरपश्चिम प्रदेशलाई ५ विकेटले पराजित गरेको हो ।
सुदुरपश्चिमले दिएको ९३ रनको लक्ष्य पछ्याएको एपीएफले १६ औं ओभरको अन्तिम बलमा ५ विकेट गुमाएर लक्ष्य भेट्यो । एपीएफको जितमा ईन्दु बर्माले ४५ बनाईन् । ज्योती पाण्डेले ११ रन जोड्दा रोमा थापाले अविजित ११ रन बनाईन् ।
ममता चौधरीले ७ तथा नेरी थापा ४ रनमा अविजित रहिन् । कप्तान सिता राना मगरले ४ रन बनाईन् ।
सुदुपश्चिमका लागि स्नेहा महरा,अनु कडायत,मनिशा चौधरी र डलि भट्टले समान १/१ विकेट लिए ।
पहिले ब्याटिङ गरेको सुदुरपश्चिमले २० ओभरमा ७ विकेट गुमाएर ९२ रन बनाएको थियो ।
सुदुरपश्चिमका लागि रितु कनौजियाले अविजित ३५ रन तथा रुबि पोदारले २३ रन बनाएकी थिईन् । स्नेहा महराले १८ रन बनाउँदा कप्तान बिन्दु रावलले ८ रन जोडिन् ।
एपीएफका लागि नेरी थापा, ईन्दु बर्मा र सुष्मा श्रेष्ठले समान १/१ विकेट लिए ।
जितसँगै एपीएफ ४ खेलमा ८ अंक जोड्दै समूह 'ए' बाट समूह बिजेताको रुपमा सेमिफाईनल प्रवेश गरेको छ । सुदुरपश्चिम भने ४ खेलमा २ अंकका साथ चौथो स्थानमा रहदै प्रतियोगिताबाट बाहिरिएको छ ।
समूह 'ए' बाट सेमिफाईनल पुग्ने अर्को टोली भने आजकै अर्को खेलबाट टुगों लाग्नेछ । बागमती प्रदेश तथा मधेश प्रदेश बीचको खेलको बिजेता सेमिफाईनल पुग्नेछ ।
समूह 'बी' बाट भने समूह बिजेताका रुपमा पुलिस क्लब र उपबिजेताका रुपमा लुम्बिनी प्रदेश सेमिफाईनल पुगिसकेका छन् ।
महिला क्रिकेटमा ९ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।
समूहको शीर्ष दुई टोलीले सेमिफाइनलमा स्थान बनाउने छन् । समूह 'ए' मा एपीएफ क्लब, मधेश प्रदेश, गण्डकी प्रदेश, सुदुरपश्चिम प्रदेश र बागमती प्रदेश रहेको छ ।
समूह 'बी' मा नेपाल पुलिस क्लब, कर्णाली प्रदेश, प्रदेश-१ र लुम्बिनी प्रदेश रहेको छ ।
