नवौं राष्ट्रिय : पुरुष भलिबलमा आर्मी समूह विजेता

पोखरा । नवौं राष्ट्रिय खेलकुद प्रतियोगिता अन्तर्गत पुरुष भलिबलमा विभागिय टोली त्रिभुबन आर्मी क्लब अपराजित रहँदै समूह 'बी' को बिजेताको रुपमा क्वाटरफाईनलमा प्रवेश गरेको छ ।

लगातार दोस्रो जित निकाल्ने क्रममा आर्मीले मधेश प्रदेशलाई पराजित गरेको हो । आईतबार पोखरा रंगशालास्थित कोर्टमा भएको खेल आर्मीले ३–० को सोझो सेटमा जितेको हो । पहिलो सेट २५–११ ले आफ्नो पक्षमा पारेको आर्मीले दोस्रो सेट २५-१२ ले जितेको थियो । तेस्रो सेट २५-१६ ले जित हात पारेर आर्मीले अन्तिम आठमा आफ्नो स्थान पक्का गरेको हो ।

यस समूहबाट क्वाटरफाईनल पुग्ने अर्को टोलीको टुङ्गो भने सोमबार हुने मधेश प्रदेश र प्रदेश नम्बर एकको खेल पछि लाग्ने छ । लिग कम नकआउटको आधारमा भईरहेको प्रतियोगितामा आर्मीले शतप्रतिशत जितसँगै ६ अंक जोडेको छ।

सहभागी ११ टिमलाई चार समूहमा विभाजन गरिएको छ । समूह 'ए' मा नेपाल पुलिस क्लब,कर्णाली प्रदेश र लुम्बिनी प्रदेश समूह ‘बी’ मा त्रिभुवन आर्मी, प्रदेश १ र मधेस प्रदेश, समूह ‘सी’ मा एपीएफ, एनआरएनए र सुदूरपश्चिम तथा समूह ‘डी’ मा गण्डकी र वाग्मती प्रदेश छन् ।

 प्रतियोगितामा समूहका शीर्ष दुई टिम क्वाटरफाइनल पुग्ने छन् । पुरुष भलिबलको फाइनल कात्तिक ३ मा हुनेछ ।