नवौं राष्ट्रिय खेलकुद : सुटिङ सुरु

पोखरा ।  नवौं राष्ट्रिय खेलकुदअन्तर्गत राष्ट्रिय सुटिङको पहिलो दिन शुक्रबार पुरुष १० मिटर एयर राइफलमा आर्मीका सुजन राना मगरले ६०८.१ अंक जोडेका छन् ।

बागमतीका कृष्णबहादुर घोरासैनीले ५८७.२ तथा सुदूरपश्चिमका सुनिल चन्दले ५६८.८ अंक जोडे ।

सोही स्पर्धाको महिलामा आर्मीकी कल्पना परियारले ६०५, प्रहरीकी फूलमाया क्याप्छाकीले ६०२.३ र मधेशकी खुश्बु चौधरीले ५४३.३ अंक जोडे ।

सातदोबाटोस्थित सुटिङ रेन्जमा भइरहेको प्रतियोगिताको पुरुष १० मिटर एयर पेस्तोलमा आर्मीका आदित्य खड्काले ५३९ र प्रहरीका मानबहादुर घलेले ५३९ तथा बागमतीका सुदन खड्काले ५३१ अंक जोडे । उक्त स्पर्धाको महिलामा आर्मीकी सरिता बस्नेतले ५३०, गण्डकीकी निस्ता पौडेलले ५१३ र बागमतीकी रुविना श्रेष्ठले ५१२ अंकको प्रदर्शन गरे ।

पुरुष÷महिलाको राइफलमा ६ सय ५४ तथा पेस्तोलमा ६ सय पूर्णाङकमा प्रतिस्पर्धा भइरहेको छ । राइफलको पुरुषमा २६ र महिलामा २५ तथा पेस्तोलको पुरुषमा २७ र महिलामा २४ खेलाडी सहभागी छन् । सबैको प्रदर्शनपछि फाइनल पुग्ने शीर्ष ८ खेलाडीको टुंगो लाग्ने छ ।

प्रतियोगितामा टिम र मिक्स स्पर्धा पनि समावेश छ । व्यक्तिगत स्पर्धामा गरेको प्रदर्शनकै आधारमा टिम र मिक्स स्पर्धामा शीर्ष तीन स्थान हासिल गर्नेको चयन गरिने नेपाल सुटिङ संघले जनाएको छ ।