रेडहर्ष इलामलाई हराउँदै बक्लौरी सेमिफाइनलमा

इलाम । सुनसरीको चक्करघट्टीमा जारी दोस्रो बराहक्षेत्र गोल्ड कप प्रतियोगितामा रेडहर्ष इलामलाई हराउँदै बकलौरी फुटबल क्लब रामधुनी सेमिफाइनलमा प्रवेश गरेको छ ।

बक्लौरीले रेडहर्षलाई २–० गोल अन्तरले हराएको हो । वक्लोरीको जितमा शिशिर लेखीले गोल गरे । एक गोल उपहार स्वरुप पाएको थियो । खेलको १२ औ मिनेटमा विकास बरालले आत्मघाती गोल गरेपछि वक्लौरीले अग्रता बनाएको थियो ।

खेलको ३४ औ मिनेटमा शिशिरले गोल गर्दै टिमलाई २–० को जित दिलाए । खेलको म्यान अफ दि म्याच शिशिर घोषित हुँदै नगद २ हजार ५ सय प्राप्त गरे ।

पहिलो सेमिफाइनलमा शनिबार शान्तिनगर फुटबल क्लब तरहरा सुनसरी र उदयपुर स्पोर्टस क्लब गाइघाटबीच प्रतिस्पर्धा हुनेछ । शान्तिनगरले रारा फुटबल क्लब राजारानी हराउँदै सेमिफाइनलमा स्थान बनाएको थियो ।

उदयपुरले हाटखोला फुटबल क्लब चतरा सुनसरीलाई हराएको थियो ।

प्रतियोगिताको विजेताले उपाधिसहित नगद १ लाख ५० हजार हात पार्नेछ भने उपविजेताले १ लाख प्राप्त गर्नेछ ।