इलाम । जुनतारा महिला फुटबल क्लब झापाको अर्जुनधारामा जारी तेस्रो खुदुनाबारी गोल्डकपको फाइनलमा प्रवेश गरेको छ ।
गाईघाट फुटबल क्लब उदयपुरलाई ४–१ गोल अन्तरले पराजित गर्दै आयोजक टिम जुनतारा गोल्डकपको फाइनलमा पुग्ने पहिलो टोलि बनेको हो ।
जुनतारालाई उपाधि होडमा प्रवेश गराउन अनिता लम्जेलले ह्याट्रिक गरिन् । उनले खेलको १४ औं मिनेटमा टिमलाई अग्रता दिलाएकी थिइन् । खेलको ५६ औं मिनटमा दोस्रो र ६३ औं मिनेटमा ह्रयाट्रिक पुरा गरिन् ।
खेलमा उत्कृष्ट प्रदर्शन गर्दै ह्याट्रिक गरेकी अनिता वुमन अफ दि म्याच घोषित भईन् । उनले ट्रफिसहित नगद एक हजार हात पारिन् । जुनताराका लागि थप एक गोल खेलको ४७ औं मिनेटमा लक्ष्मी श्रेष्ठले गरिन् ।
गाईघाट फुटबल क्लब उदयपुरले पाएको पेनाल्टीको अवसर सदुपयोग गर्न बाहेक खेलमा अन्य स्कोर गर्न सकेन । दोस्रो हाफमा डि बक्स एरियामा फल्ड भएपछि उदयपुरले पाएको पेनाल्टीलाई सदिपा भोलानले गोलमा परिणत गरिन् । जनता सेभेन फुटबल क्लब इलामलाई क्वाटरफाइनलमा ५–० गोल अन्तरले पराजित गर्दै जुनतारा सेमिफाइनलमा प्रवेश गरेको थियो । उदयपुरले सेमिफाइनल प्रवेशका लागि ताप्लेजुङ जिल्ला फुटबल संघलाई टाईब्रेकरमा ३–१ गोल अन्तरले पराजित गरेको थियो ।
गोल्डकपको दोस्रो सेमिफाइनलमा भोलि (शुक्रबार) पथरी शनिश्चरे महिला फुटबल क्लब मोरङ र धनकुटा महिला फुटबल संघबिच प्रतिस्पर्धा हुने छ । फाइनल खेल आगामी १६ गते हुनेछ ।
अर्जुनधारा नगरपालिका–३ स्थित प्रस्तावित प्राकृतिक रंगशालामा जारी गोल्डकपको विजेताले नगद १ लाख १ हजार १११ रुपैयाँ सहित ट्रफी पाउने छ भने उपविजेताले नगद ५५ हजार ५५५ सहित ट्रफी पाउने छ ।
अर्जुनधारा नगरपालिका मुख्य प्रर्वद्धक रहेको गोल्डकपको सहआयोजक जुनतारा महिला फुटबल क्लब रहेको छ ।
