काठमाडौं । नेपाली राष्ट्रिय फुटबल टिमले मंगलबार दक्षिण एसियाली प्रतिद्वन्दी बंगलादेशविरुद्ध मैत्रीपूर्ण खेल खेल्दैछ।
घरेलु मैदान दशरथ रंगशालामा नेपालले फिफा इन्टरनेसनल विन्डो अन्तर्गत बंगलादेशविरुद्ध मैत्रीपूर्ण खेल खेल्न लागेको हो ।
बंगलादेशविरुद्धको खेलका लागि नेपालले अन्तिम तयारी गरिरहेको छ । नेपाल घरेलु मैदानमा बंगलादेशलाई हराएर समर्थकलाई दशैंको उपहार दिन चाहन्छ ।
नेपाली टोलीका कार्यवाहक मुख्य प्रशिक्षक प्रदिप हुमागाईले बंगलादेशविरुद्ध जित निकाल्दै दशैंको बेला फुटबल समर्थकलाई खुशी पार्ने योजना रहेको बताउँछन् ।
'अहिले २४ घण्टा राष्ट्रिय टोलीमा केन्द्रित छु । त्यसैमा इन्जोय गरिरहेको छु । खेलाडीहरु फ्रेन्डली छ, डाइनामिक छ । नेपाली खेलाडीहरु पक्कै पनि डाइमन्ड हो । गोल्ड हो । हामी टिमको रुपमा अगाडी बढिरहेका छौँ,' आइतबार संचारकर्मीसँग कुरा गर्दै हुमागाईले भने, 'मुख्य त नतिजा महत्वपूर्ण हो । दशैंको बेलामा नेपाली फुटबल समर्थकलाई नतिजा दिन सक्यो भने छुट्टै मजा आउछ ।'
मैत्रीपूर्ण खेलका लागि बंगलादेशी टोली नेपाल आईसकेका छन् । कम्बोडियासँग एक मैत्रीपूर्ण खेल खेलेर बंगलादेशी टोली नेपाल आएको हो । कम्बोडियासँगको खेलमा बंगलादेश १-० ले विजयी भएको थियो ।
हुमागाईले बंगलादेशी टोली राम्रो भएको भएपनि नेपाली टोली पनि त्यतिनै उत्कृष्ट रहेको बताए ।
'बंगलादेशको फुटबल उच्च स्तरमा विकास भईरहेको छ । सबै उमेर समूहमा पनि राम्रो नतिजा निकालेको छ । नेपालसँग खेल्दै झनै राम्रो खेल्छ । देश नै विकास भईरहेको अवस्थामा फुटबल बिकस हुनु स्वभाविक प्रक्रिया पनि हो । त्यसैले पक्कैपनि उनीहरु राम्रो छ । तर, हामी पनि राम्रो छौँ,' विपक्षी टोलीबारे हुमागाईले भने ।
हुमागाईले बंगलादेशविरुद्धको खेलका लागि तयारी राम्रो भएको समेत बताए । उनले सुरुआतमा टिम निर्माण गर्न भने कठिन भएको बताए ।
'आजसम्म ट्रेनिङहरु राम्रो भएको छ । बिचमा इन्जुरी र डेंगुको समस्याले अलिकति तनाब पनि भएको थियो । तर, ट्रेनिङ अन्तिम दिनसम्म आईपुग्दा ९९ प्रतिशतले राम्रोसँग टुंगाउन सक्यौं । आशा गरौँ यो ट्रेनिङ सेसनको कारण खेल पनि राम्रो हुन्छ,' उनले भने, 'नेपालमा फुटबल भईरहेको थिएन । लामो समयपछि खेल्न लागेको हो । लिग र घरेलु प्रतियोगिता नभएको अवस्थामा खेलाडीलाई बोलाएर एउटा टिम बनाउन सुरूको दिनमा धेरै गार्हो भयो । खेलाडीलाई पनि फिटनेसमा गार्हो भयो । तर, अन्तिममा जे जस्तो छ त्यसलाई उपयोग गरेर हामी लक्ष्यसम्म पुग्यौं । तयारीमा अन्तुष्ट छौँ । सबै खेलाडी फिट र ठिक छन्।'
बंगलादेशविरुद्धको खेलका लागि हुमागाईले २३ सदस्सीय नेपाली टोलीको घोषणा गरिसकेका छन् । नेपाली टोलीमा दुई नयाँ खेलाडीले पहिलो पटक स्थान बनाएका छन् ।
यस्तै हुमागाईले मैत्रीपूर्ण खेलका लागि ४ गोलकिपर टोलीमा राखेका छन् । एक मैत्रीपूर्ण खेलका लागि चार गोलकिपर टोलीमा राखेको कारण हुमागाईको विरोध समेत भएको छ । तर, उनले आफ्नो सिदान्त अनुसार टिम घोषणा गरेको बताए ।
'चार जना गोलकिपर उनीहरु राष्ट्रिय टिमका लागि योग्य छन् । उनीहरुको हार्ड वर्क, क्रियटिभीटी, उनीहरुको कामलाई सलुट गर्ने ठाउँ छ । बाध्य भयौं की उनीहरुलाई हटाउने ठाउँ नै भएन,' उनले कारण बताए ।
तत्कालिन मुख्य प्रशिक्षक अब्दुल्लाह अलमुताईरीको अनुपस्थितिमा हुमागाईले टिम हेर्ने अवसर पाएका हुन् । यस अवसरलाई उनले मौका र चुनौती दुबै ठानेका छन् । उनी जितसँगै यस अवसरलाई टुंगाउन चाहन्छन् ।
'यो मेरो लागि मौका पनि हो र चुनौती पनि हो । नेपाली फुटबल अर्को बाटोमा जाने क्रममा म पुल भएर हेल्प गर्न पाउनु सौभाग्य हो । आशा छ जितसँगै यसलाई टुंगाउन सकु,' हुमागाईले भने ।
